जय जय सुरनायक जन सुखदायक

जय जय सुरनायक जन सुखदायक प्रनतपाल भगवंता।
गो द्विज हितकारी जय असुरारी सिंधुसुता प्रिय कंता॥
पालन सुर धरनी अद्भुत करनी मरम न जानइ कोई।
जो सहज कृपाला दीनदयाला करउ अनुग्रह सोई॥

जय जय अबिनासी सब घट बासी ब्यापक परमानंदा।
अबिगत गोतीतं चरित पुनीतं मायारहित मुकुंदा॥
जेहि लागि बिरागी अति अनुरागी बिगतमोह मुनिबृंदा।
निसि बासर ध्यावहिं गुन गन गावहिं जयति सच्चिदानंदा॥

जेहिं सृष्टि उपाई त्रिबिध बनाई संग सहाय न दूजा।
सो करउ अघारी चिंत हमारी जानिअ भगति न पूजा॥
जो भव भय भंजन मुनि मन रंजन गंजन बिपति बरूथा।
मन बच क्रम बानी छाड़ि सयानी सरन सकल सुर जूथा॥

सारद श्रुति सेषा रिषय असेषा जा कहुँ कोउ नहि जाना।
जेहि दीन पिआरे बेद पुकारे द्रवउ सो श्रीभगवाना॥
भव बारिधि मंदर सब बिधि सुंदर गुनमंदिर सुखपुंजा।
मुनि सिद्ध सकल सुर परम भयातुर नमत नाथ पद कंजा॥

Jay jay suranayak jan sukhadayak pranatapal Bhagvanta,
go dvij hitkari jay asurari Sindhusuta priya kanta.
Palan sur dharani adbhut karani maram na janai koi,
jo sahaj kripala dindayala karau anugrah soi.

Jay jay abinasi sab ghat basi byapak paramananda,
abigat gotitam charit punitam mayarahit Mukunda.
Jehi lagi biragi ati anuragi bigatamoh munibrinda,
nisi basar dhyavahin gun gan gavahin jayati Sachchidananda.

Jehin srishti upai tribidh banai sang sahay na duja,
so karau aghari chint hamari janiya bhagati na puja.
Jo bhav bhay bhanjan muni man ranjan ganjan bipati barutha,
man bach kram bani chhadi sayani saran sakal sur jutha.

Sarad shruti sesha rishay asesha ja kahun kou nahi jana,
jehi din piare Bed pukare dravau so Shri Bhagvana.
Bhav baridhi mandar sab bidhi sundar gunamandir sukhapunja,
muni siddh sakal sur param bhayatur namat nath pad kanja.