हनुमान चालीसा (श्रीगुरु चरन सरोज रज)

श्रीगुरु चरन सरोज रज निज मनु मुकुरु सुधारि।
बरनउँ रघुबर बिमल जसु जो दायकु फल चारि॥
बुद्धिहीन तनु जानिके सुमिरौं पवन-कुमार।
बल बुधि बिद्या देहु मोहिं हरहु कलेस बिकार॥

जय हनुमान ज्ञान गुन सागर। जय कपीस तिहुँ लोक उजागर॥
राम दूत अतुलित बल धामा। अंजनि-पुत्र पवनसुत नामा॥
महाबीर बिक्रम बजरंगी। कुमति निवार सुमति के संगी॥
कंचन बरन बिराज सुबेसा। कानन कुंडल कुंचित केसा॥

हाथ बज्र औ ध्वजा बिराजै। काँधे मूँज जनेऊ साजै॥
संकर सुवन केसरीनंदन। तेज प्रताप महा जग बंदन॥
बिद्यावान गुनी अति चातुर। राम काज करिबे को आतुर॥
प्रभु चरित्र सुनिबे को रसिया। राम लखन सीता मन बसिया॥

सूक्ष्म रूप धरि सियहिं दिखावा। बिकट रूप धरि लंक जरावा॥
भीम रूप धरि असुर सँहारे। रामचंद्र के काज सँवारे॥
लाय सजीवन लखन जियाये। श्रीरघुबीर हरषि उर लाये॥
रघुपति कीन्ही बहुत बड़ाई। तुम मम प्रिय भरतहि सम भाई॥

सहस बदन तुम्हरो जस गावैं। अस कहि श्रीपति कंठ लगावैं॥
सनकादिक ब्रह्मादि मुनीसा। नारद सारद सहित अहीसा॥
जम कुबेर दिगपाल जहाँ ते। कबि कोबिद कहि सके कहाँ ते॥
तुम उपकार सुग्रीवहिं कीन्हा। राम मिलाय राज पद दीन्हा॥

तुम्हरो मंत्र बिभीषन माना। लंकेस्वर भए सब जग जाना॥
जुग सहस्र जोजन पर भानू। लील्यो ताहि मधुर फल जानू॥
प्रभु मुद्रिका मेलि मुख माहीं। जलधि लाँघि गये अचरज नाहीं॥
दुर्गम काज जगत के जेते। सुगम अनुग्रह तुम्हरे तेते॥

राम दुआरे तुम रखवारे। होत न आज्ञा बिनु पैसारे॥
सब सुख लहै तुम्हारी सरना। तुम रच्छक काहू को डर ना॥
आपन तेज सम्हारो आपै। तीनों लोक हाँक तें काँपै॥
भूत पिसाच निकट नहिं आवै। महाबीर जब नाम सुनावै॥

नासै रोग हरै सब पीरा। जपत निरंतर हनुमत बीरा॥
संकट तें हनुमान छुड़ावै। मन क्रम बचन ध्यान जो लावै॥
सब पर राम तपस्वी राजा। तिन के काज सकल तुम साजा॥
और मनोरथ जो कोई लावै। सोइ अमित जीवन फल पावै॥

चारों जुग परताप तुम्हारा। है परसिद्ध जगत उजियारा॥
साधु संत के तुम रखवारे। असुर निकंदन राम दुलारे॥
अष्ट सिद्धि नौ निधि के दाता। अस बर दीन जानकी माता॥
राम रसायन तुम्हरे पासा। सदा रहो रघुपति के दासा॥

तुम्हरे भजन राम को पावै। जनम जनम के दुख बिसरावै॥
अंत काल रघुबर पुर जाई। जहाँ जन्म हरि-भक्त कहाई॥
और देवता चित्त न धरई। हनुमत सेइ सर्ब सुख करई॥
संकट कटै मिटै सब पीरा। जो सुमिरै हनुमत बलबीरा॥

जै जै जै हनुमान गोसाईं। कृपा करहु गुरुदेव की नाईं॥
जो सत बार पाठ कर कोई। छूटहि बंदि महा सुख होई॥
जो यह पढ़ै हनुमान चालीसा। होय सिद्धि साखी गौरीसा॥
तुलसीदास सदा हरि चेरा। कीजै नाथ हृदय महँ डेरा॥

पवनतनय संकट हरन मंगल मूरति रूप।
राम लखन सीता सहित हृदय बसहु सुर भूप॥

Shri guru charan saroj raj nij manu mukuru sudhari,
baranau raghubar bimal jasu jo dayaku phal chari.
Buddhiheen tanu janike sumirau pavan-kumar,
bal budhi bidya dehu mohi harahu kales bikar.

Jai Hanuman gyan gun sagar, jai kapis tihun lok ujagar.
Ram doot atulit bal dhama, Anjani-putra Pavanasut nama.
Mahabir bikram Bajrangi, kumati nivar sumati ke sangi.
Kanchan baran biraj subesa, kanan kundal kunchit kesa.

Hath bajra au dhvaja birajai, kandhe moonj janeu sajai.
Sankar suvan Kesarinandan, tej pratap maha jag bandan.
Bidyavan guni ati chatur, Ram kaj karibe ko atur.
Prabhu charitra sunibe ko rasiya, Ram Lakhan Sita man basiya.

Sukshma roop dhari Siyahi dikhava, bikat roop dhari Lank jarava.
Bheem roop dhari asur sanhare, Ramachandra ke kaj sanvare.
Laya sajivan Lakhan jiyaye, Shri Raghubir harashi ur laye.
Raghupati kinhi bahut badai, tum mam priya Bharatahi sam bhai.

Sahas badan tumharo jas gavain, as kahi Shripati kanth lagavain.
Sanakadik Brahmadi munisa, Narad Sarad sahit Ahisa.
Jam Kuber digpal jahan te, kabi kobid kahi sake kahan te.
Tum upkar Sugrivahi kinha, Ram milaya raj pad dinha.

Tumharo mantra Bibhishan mana, Lankeshvar bhae sab jag jana.
Jug sahasra jojan par bhanu, lilyo tahi madhur phal janu.
Prabhu mudrika meli mukh mahin, jaladhi langhi gaye acharaj nahin.
Durgam kaj jagat ke jete, sugam anugrah tumhare tete.

Ram duare tum rakhvare, hot na agya binu paisare.
Sab sukh lahai tumhari sarna, tum rachchhak kahu ko dar na.
Apan tej samharo apai, tinon lok hank ten kanpai.
Bhoot pisach nikat nahin avai, Mahabir jab nam sunavai.

Nasai rog harai sab pira, japat nirantar Hanumat bira.
Sankat ten Hanuman chhudavai, man kram bachan dhyan jo lavai.
Sab par Ram tapasvi raja, tin ke kaj sakal tum saja.
Aur manorath jo koi lavai, soi amit jivan phal pavai.

Charon jug partap tumhara, hai parasiddh jagat ujiyara.
Sadhu sant ke tum rakhvare, asur nikandan Ram dulare.
Ashta siddhi nau nidhi ke data, as bar din Janaki mata.
Ram rasayan tumhare pasa, sada raho Raghupati ke dasa.

Tumhare bhajan Ram ko pavai, janam janam ke dukh bisravai.
Ant kal Raghubar pur jai, jahan janma Hari-bhakt kahai.
Aur devta chitt na dharai, Hanumat sei sarb sukh karai.
Sankat katai mitai sab pira, jo sumirai Hanumat balbira.

Jai jai jai Hanuman Gosain, kripa karahu gurudev ki nain.
Jo sat bar path kar koi, chhutahi bandi maha sukh hoi.
Jo yah padhai Hanuman Chalisa, hoya siddhi sakhi Gaurisa.
Tulsidas sada Hari chera, kijai nath hriday mahan dera.

Pavantanay sankat haran mangal murati roop,
Ram Lakhan Sita sahit hriday basahu sur bhoop.