मैया, कबहुँ बढ़ैगी चोटी

मैया कबहुँ बढ़ैगी चोटी।
किती बेर मोहि दूध पियत भइ यह अजहूँ है छोटी॥

तू जो कहति बल की बेनी ज्यों ह्वै है लाँबी मोटी।
काढ़त गुहत न्हवावत जैहै नागिन-सी भुइँ लोटी॥

काचो दूध पियावति पचि पचि देति न माखन रोटी।
सूरदास त्रिभुवन मनमोहन हरि हलधर की जोटी॥

Maiya kabahun badhaigi choti,
kiti ber mohi dudh piyat bhai yah ajahun hai chhoti.

Tu jo kahati Bal ki beni jyon hvai hai lanbi moti,
kadhat guhat nhavavat jaihai nagin-si bhuin loti.

Kacho dudh piyavati pachi pachi deti na makhan roti,
Surdas tribhuvan manmohan Hari Haladhar ki joti.