जसोदा हरि पालनैं झुलावै

जसोदा हरि पालनैं झुलावै।
हलरावै दुलराइ मल्हावै जोइ-जोइ कछु गावै॥

मेरे लाल कौं आउ निंदरिया काहैं न आनि सुवावै।
तू काहैं नहिं बेगहिं आवै तोकौं कान्ह बुलावै॥

कबहुँ पलक हरि मूँदि लेत हैं कबहुँ अधर फरकावै।
सोवत जानि मौन ह्वै कै रहि करि-करि सैन बतावै॥

इहिं अंतर अकुलाइ उठे हरि जसुमति मधुरैं गावै।
जो सुख सूर अमर-मुनि दुरलभ सो नँद-भामिनि पावै॥

Jasoda Hari palnain jhulavai,
halravai dulrai malhavai joi-joi kachhu gavai.

Mere lal kaun au nindariya kahain na ani suvavai,
tu kahain nahin begahin avai tokaun Kanh bulavai.

Kabahun palak Hari mundi let hain kabahun adhar pharkavai,
sovat jani maun hvai kai rahi kari-kari sain batavai.

Ihin antar akulai uthe Hari Jasumati madhurain gavai,
jo sukh Sur amar-muni duralabh so Nand-bhamini pavai.