भए प्रगट कृपाला दीनदयाला

भए प्रगट कृपाला दीनदयाला कौसल्या हितकारी।
हरषित महतारी मुनि मन हारी अद्भुत रूप बिचारी॥
लोचन अभिरामा तनु घनस्यामा निज आयुध भुज चारी।
भूषन बनमाला नयन बिसाला सोभासिंधु खरारी॥

कह दुइ कर जोरी अस्तुति तोरी केहि बिधि करौं अनंता।
माया गुन ग्यानातीत अमाना बेद पुरान भनंता॥
करुना सुख सागर सब गुन आगर जेहि गावहिं श्रुति संता।
सो मम हित लागी जन अनुरागी भयउ प्रगट श्रीकंता॥

ब्रह्मांड निकाया निर्मित माया रोम रोम प्रति बेद कहै।
मम उर सो बासी यह उपहासी सुनत धीर मति थिर न रहै॥
उपजा जब ग्याना प्रभु मुसुकाना चरित बहुत बिधि कीन्ह चहै।
कहि कथा सुहाई मातु बुझाई जेहि प्रकार सुत प्रेम लहै॥

माता पुनि बोली सो मति डोली तजहु तात यह रूपा।
कीजै सिसुलीला अति प्रियसीला यह सुख परम अनूपा॥
सुनि बचन सुजाना रोदन ठाना होइ बालक सुरभूपा।
यह चरित जे गावहिं हरिपद पावहिं ते न परहिं भवकूपा॥

Bhae pragat kripala dindayala Kausalya hitkari,
harashit mahatari muni man hari adbhut roop bichari.
Lochan abhirama tanu ghanasyama nij ayudh bhuj chari,
bhushan banamala nayan bisala sobhasindhu Kharari.

Kah dui kar jori astuti tori kehi bidhi karaun ananta,
maya gun gyanatit amana Bed Puran bhananta.
Karuna sukh sagar sab gun agar jehi gavahin shruti santa,
so mam hit lagi jan anuragi bhayau pragat Shrikanta.

Brahmand nikaya nirmit maya rom rom prati Bed kahai,
mam ur so basi yah upahasi sunat dhir mati thir na rahai.
Upaja jab gyana prabhu musukana charit bahut bidhi kinh chahai,
kahi katha suhai matu bujhai jehi prakar sut prem lahai.

Mata puni boli so mati doli tajahu tat yah roopa,
kijai sisulila ati priyasila yah sukh param anupa.
Suni bachan sujana rodan thana hoi balak surbhupa,
yah charit je gavahin Haripad pavahin te na parahin bhavakupa.