असृ॑ग्र॒मिन्द॑वः प॒था धर्म॑न्नृ॒तस्य॑ सु॒श्रिय॑ः ।
वि॒दा॒ना अ॑स्य॒ योज॑नम्
asṛgramindavaḥ pathā dharmannṛtasya suśriyaḥ |
vidānā asya yojanam
Mandala 9
Sukta 7: Drops Released on the Path of Rita
Rishi: कश्यपोऽसितो देवलो वा · Devata: पवमानः सोमः · Metre: गायत्री
9 verses · 7 of 114
What happens in this chapter
Drops Released on the Path of Rita
Kashyapa Asita or Devala sings to Pavamana Soma in gayatri. The bright drops are released along the path of Rita, knowing the way. The first stream of honey plunges into the great waters, an offering worthy of praise among offerings. Wearing poetic wisdom and strength, the poet flows, wishing to win the sunlit sky. Like a king among his people he sits over his rivals when the priests urge him on. Tawny, he settles in the wooden vessels past the fleece and goes with joy to Vayu, Indra and the Ashvins. His waves of honey reach Mitra, Varuna and Bhaga; Heaven and Earth are asked for wealth and fame.
प्र धारा॒ मध्वो॑ अग्रि॒यो म॒हीर॒पो वि गा॑हते ।
ह॒विर्ह॒विष्षु॒ वन्द्य॑ः
pra dhārā madhvo agriyo mahīrapo vi gāhate |
havirhaviṣṣu vandyaḥ
प्र यु॒जो वा॒चो अ॑ग्रि॒यो वृषाव॑ चक्रद॒द्वने॑ ।
सद्मा॒भि स॒त्यो अ॑ध्व॒रः
pra yujo vāco agriyo vṛṣāva cakradadvane |
sadmābhi satyo adhvaraḥ
परि॒ यत्काव्या॑ क॒विर्नृ॒म्णा वसा॑नो॒ अर्ष॑ति ।
स्व॑र्वा॒जी सि॑षासति
pari yatkāvyā kavirnṛmṇā vasāno arṣati |
svarvājī siṣāsati
पव॑मानो अ॒भि स्पृधो॒ विशो॒ राजे॑व सीदति ।
यदी॑मृ॒ण्वन्ति॑ वे॒धस॑ः
pavamāno abhi spṛdho viśo rājeva sīdati |
yadīmṛṇvanti vedhasaḥ
अव्यो॒ वारे॒ परि॑ प्रि॒यो हरि॒र्वने॑षु सीदति ।
रे॒भो व॑नुष्यते म॒ती
avyo vāre pari priyo harirvaneṣu sīdati |
rebho vanuṣyate matī
स वा॒युमिन्द्र॑म॒श्विना॑ सा॒कं मदे॑न गच्छति ।
रणा॒ यो अ॑स्य॒ धर्म॑भिः
sa vāyumindramaśvinā sākaṃ madena gacchati |
raṇā yo asya dharmabhiḥ
आ मि॒त्रावरु॑णा॒ भगं॒ मध्व॑ः पवन्त ऊ॒र्मय॑ः ।
वि॒दा॒ना अ॑स्य॒ शक्म॑भिः
ā mitrāvaruṇā bhagaṃ madhvaḥ pavanta ūrmayaḥ |
vidānā asya śakmabhiḥ
अ॒स्मभ्यं॑ रोदसी र॒यिं मध्वो॒ वाज॑स्य सा॒तये॑ ।
श्रवो॒ वसू॑नि॒ सं जि॑तम्
asmabhyaṃ rodasī rayiṃ madhvo vājasya sātaye |
śravo vasūni saṃ jitam
Text source: Wikisource · CC BY-SA 4.0 (Wikisource transcription of a public-domain text)