ए॒ते सोमा॑ अ॒भि प्रि॒यमिन्द्र॑स्य॒ काम॑मक्षरन् ।
वर्ध॑न्तो अस्य वी॒र्य॑म्
ete somā abhi priyamindrasya kāmamakṣaran |
vardhanto asya vīryam
Mandala 9
Sukta 8: Robed in Milk Within the Kalashas
Rishi: कश्यपोऽसितो देवलो वा · Devata: पवमानः सोमः · Metre: गायत्री
9 verses · 8 of 114
What happens in this chapter
Robed in Milk Within the Kalashas
Kashyapa Asita or Devala addresses Pavamana Soma in gayatri. These drops have flowed to Indra's dear desire, increasing his strength, and go purified to Vayu and the Ashvins. Soma is asked to stir Indra's heart toward bounty and to sit in the womb of Rita. Ten fingers groom him, seven thoughts urge him on, and the sages rejoice. Released beyond the fleece, the ruddy tawny one is purified in the kalashas and puts on garments of cow's milk. The singers ask him to drive away all who hate, to pour rain from heaven, to give strength in battles, and to let them share offspring and food.
पु॒ना॒नास॑श्चमू॒षदो॒ गच्छ॑न्तो वा॒युम॒श्विना॑ ।
ते नो॑ धान्तु सु॒वीर्य॑म्
punānāsaścamūṣado gacchanto vāyumaśvinā |
te no dhāntu suvīryam
इन्द्र॑स्य सोम॒ राध॑से पुना॒नो हार्दि॑ चोदय ।
ऋ॒तस्य॒ योनि॑मा॒सद॑म्
indrasya soma rādhase punāno hārdi codaya |
ṛtasya yonimāsadam
मृ॒जन्ति॑ त्वा॒ दश॒ क्षिपो॑ हि॒न्वन्ति॑ स॒प्त धी॒तय॑ः ।
अनु॒ विप्रा॑ अमादिषुः
mṛjanti tvā daśa kṣipo hinvanti sapta dhītayaḥ |
anu viprā amādiṣuḥ
दे॒वेभ्य॑स्त्वा॒ मदा॑य॒ कं सृ॑जा॒नमति॑ मे॒ष्य॑ः ।
सं गोभि॑र्वासयामसि
devebhyastvā madāya kaṃ sṛjānamati meṣyaḥ |
saṃ gobhirvāsayāmasi
पु॒ना॒नः क॒लशे॒ष्वा वस्त्रा॑ण्यरु॒षो हरि॑ः ।
परि॒ गव्या॑न्यव्यत
punānaḥ kalaśeṣvā vastrāṇyaruṣo hariḥ |
pari gavyānyavyata
म॒घोन॒ आ प॑वस्व नो ज॒हि विश्वा॒ अप॒ द्विष॑ः ।
इन्दो॒ सखा॑य॒मा वि॑श
maghona ā pavasva no jahi viśvā apa dviṣaḥ |
indo sakhāyamā viśa
वृ॒ष्टिं दि॒वः परि॑ स्रव द्यु॒म्नं पृ॑थि॒व्या अधि॑ ।
सहो॑ नः सोम पृ॒त्सु धा॑ः
vṛṣṭiṃ divaḥ pari srava dyumnaṃ pṛthivyā adhi |
saho naḥ soma pṛtsu dhāḥ
नृ॒चक्ष॑सं त्वा व॒यमिन्द्र॑पीतं स्व॒र्विद॑म् ।
भ॒क्षी॒महि॑ प्र॒जामिष॑म्
nṛcakṣasaṃ tvā vayamindrapītaṃ svarvidam |
bhakṣīmahi prajāmiṣam
Text source: Wikisource · CC BY-SA 4.0 (Wikisource transcription of a public-domain text)