यु॒क्ष्वा हि दे॑व॒हूत॑माँ॒ अश्वाँ॑ अग्ने र॒थीरि॑व ।
नि होता॑ पू॒र्व्यः स॑दः
yukṣvā hi devahūtamām̐ aśvām̐ agne rathīriva |
ni hotā pūrvyaḥ sadaḥ
Mandala 8
Sukta 75: Agni, carry us across from afar
Rishi: विरूप आङ्गिरसः · Devata: अग्निः · Metre: गायत्री
16 verses · 75 of 103
What happens in this chapter
Agni, carry us across from afar
Virupa Angirasa asks Agni to yoke his god-calling horses like a charioteer and sit as the ancient hotar. Youngest one, son of strength, lord of a thousandfold strength, head of riches: bring the gods near and make all treasures ours. Virupa urges himself to praise with eternal speech. The prayers turn anxious. Let not the hatred of the evil-minded strike us as a wave strikes a boat. Do not cast us aside in this great contest like a porter dropping his load. Let misfortune follow another, not us. Cross from the far side to the near, and protect the place where I stand. We know you as a father's care.
उ॒त नो॑ देव दे॒वाँ अच्छा॑ वोचो वि॒दुष्ट॑रः ।
श्रद्विश्वा॒ वार्या॑ कृधि
uta no deva devām̐ acchā voco viduṣṭaraḥ |
śradviśvā vāryā kṛdhi
त्वं ह॒ यद्य॑विष्ठ्य॒ सह॑सः सूनवाहुत ।
ऋ॒तावा॑ य॒ज्ञियो॒ भुव॑ः
tvaṃ ha yadyaviṣṭhya sahasaḥ sūnavāhuta |
ṛtāvā yajñiyo bhuvaḥ
अ॒यम॒ग्निः स॑ह॒स्रिणो॒ वाज॑स्य श॒तिन॒स्पति॑ः ।
मू॒र्धा क॒वी र॑यी॒णाम्
ayamagniḥ sahasriṇo vājasya śatinaspatiḥ |
mūrdhā kavī rayīṇām
तं ने॒मिमृ॒भवो॑ य॒था न॑मस्व॒ सहू॑तिभिः ।
नेदी॑यो य॒ज्ञम॑ङ्गिरः
taṃ nemimṛbhavo yathā namasva sahūtibhiḥ |
nedīyo yajñamaṅgiraḥ
तस्मै॑ नू॒नम॒भिद्य॑वे वा॒चा वि॑रूप॒ नित्य॑या ।
वृष्णे॑ चोदस्व सुष्टु॒तिम्
tasmai nūnamabhidyave vācā virūpa nityayā |
vṛṣṇe codasva suṣṭutim
कमु॑ ष्विदस्य॒ सेन॑या॒ग्नेरपा॑कचक्षसः ।
प॒णिं गोषु॑ स्तरामहे
kamu ṣvidasya senayāgnerapākacakṣasaḥ |
paṇiṃ goṣu starāmahe
मा नो॑ दे॒वानां॒ विश॑ः प्रस्ना॒तीरि॑वो॒स्राः ।
कृ॒शं न हा॑सु॒रघ्न्या॑ः
mā no devānāṃ viśaḥ prasnātīrivosrāḥ |
kṛśaṃ na hāsuraghnyāḥ
मा न॑ः समस्य दू॒ढ्य१॒॑ः परि॑द्वेषसो अंह॒तिः ।
ऊ॒र्मिर्न नाव॒मा व॑धीत्
mā naḥ samasya dūḍhyaḥ paridveṣaso aṃhatiḥ |
ūrmirna nāvamā vadhīt
नम॑स्ते अग्न॒ ओज॑से गृ॒णन्ति॑ देव कृ॒ष्टय॑ः ।
अमै॑र॒मित्र॑मर्दय
namaste agna ojase gṛṇanti deva kṛṣṭayaḥ |
amairamitramardaya
कु॒वित्सु नो॒ गवि॑ष्ट॒येऽग्ने॑ सं॒वेषि॑षो र॒यिम् ।
उरु॑कृदु॒रु ण॑स्कृधि
kuvitsu no gaviṣṭaye'gne saṃveṣiṣo rayim |
urukṛduru ṇaskṛdhi
मा नो॑ अ॒स्मिन्म॑हाध॒ने परा॑ वर्ग्भार॒भृद्य॑था ।
सं॒वर्गं॒ सं र॒यिं ज॑य
mā no asminmahādhane parā vargbhārabhṛdyathā |
saṃvargaṃ saṃ rayiṃ jaya
अ॒न्यम॒स्मद्भि॒या इ॒यमग्ने॒ सिष॑क्तु दु॒च्छुना॑ ।
वर्धा॑ नो॒ अम॑व॒च्छव॑ः
anyamasmadbhiyā iyamagne siṣaktu ducchunā |
vardhā no amavacchavaḥ
यस्याजु॑षन्नम॒स्विन॒ः शमी॒मदु॑र्मखस्य वा ।
तं घेद॒ग्निर्वृ॒धाव॑ति
yasyājuṣannamasvinaḥ śamīmadurmakhasya vā |
taṃ ghedagnirvṛdhāvati
पर॑स्या॒ अधि॑ सं॒वतोऽव॑राँ अ॒भ्या त॑र ।
यत्रा॒हमस्मि॒ ताँ अ॑व
parasyā adhi saṃvato'varām̐ abhyā tara |
yatrāhamasmi tām̐ ava
वि॒द्मा हि ते॑ पु॒रा व॒यमग्ने॑ पि॒तुर्यथाव॑सः ।
अधा॑ ते सु॒म्नमी॑महे
vidmā hi te purā vayamagne pituryathāvasaḥ |
adhā te sumnamīmahe
Text source: Wikisource · CC BY-SA 4.0 (Wikisource transcription of a public-domain text)