उदी॑राथामृताय॒ते यु॒ञ्जाथा॑मश्विना॒ रथ॑म् ।
अन्ति॒ षद्भू॑तु वा॒मव॑ः
udīrāthāmṛtāyate yuñjāthāmaśvinā ratham |
anti ṣadbhūtu vāmavaḥ
Mandala 8
Sukta 73: Ashvins, let your help be near
Rishi: गोपवन आत्रेयः सप्तवध्रिर्वा · Devata: अश्विनौ · Metre: गायत्री
18 verses · 73 of 103
What happens in this chapter
Ashvins, let your help be near
Gopavana Atreya, or Saptavadhri, calls the Ashvins with one refrain after every line: let your help be near. Yoke your chariot, swifter than the blink of an eye. For Atri you covered the burning heat with snow and made him a sheltered house; Saptavadhri by prayer stilled the stream of fire. Where are you, where have you gone, where have you flown like hawks? Come with cows and horses by the thousand; do not pass us by. Ruddy Dawn has appeared. Cut through like a woodsman with his axe, the rishi pleads, and break open the fort, for he is hard pressed by the dark host.
नि॒मिष॑श्चि॒ज्जवी॑यसा॒ रथे॒ना या॑तमश्विना ।
अन्ति॒ षद्भू॑तु वा॒मव॑ः
nimiṣaścijjavīyasā rathenā yātamaśvinā |
anti ṣadbhūtu vāmavaḥ
उप॑ स्तृणीत॒मत्र॑ये हि॒मेन॑ घ॒र्मम॑श्विना ।
अन्ति॒ षद्भू॑तु वा॒मव॑ः
upa stṛṇītamatraye himena gharmamaśvinā |
anti ṣadbhūtu vāmavaḥ
कुह॑ स्थ॒ः कुह॑ जग्मथु॒ः कुह॑ श्ये॒नेव॑ पेतथुः ।
अन्ति॒ षद्भू॑तु वा॒मव॑ः
kuha sthaḥ kuha jagmathuḥ kuha śyeneva petathuḥ |
anti ṣadbhūtu vāmavaḥ
यद॒द्य कर्हि॒ कर्हि॑ चिच्छुश्रू॒यात॑मि॒मं हव॑म् ।
अन्ति॒ षद्भू॑तु वा॒मव॑ः
yadadya karhi karhi cicchuśrūyātamimaṃ havam |
anti ṣadbhūtu vāmavaḥ
अ॒श्विना॑ याम॒हूत॑मा॒ नेदि॑ष्ठं या॒म्याप्य॑म् ।
अन्ति॒ षद्भू॑तु वा॒मव॑ः
aśvinā yāmahūtamā nediṣṭhaṃ yāmyāpyam |
anti ṣadbhūtu vāmavaḥ
अव॑न्त॒मत्र॑ये गृ॒हं कृ॑णु॒तं यु॒वम॑श्विना ।
अन्ति॒ षद्भू॑तु वा॒मव॑ः
avantamatraye gṛhaṃ kṛṇutaṃ yuvamaśvinā |
anti ṣadbhūtu vāmavaḥ
वरे॑थे अ॒ग्निमा॒तपो॒ वद॑ते व॒ल्ग्वत्र॑ये ।
अन्ति॒ षद्भू॑तु वा॒मव॑ः
varethe agnimātapo vadate valgvatraye |
anti ṣadbhūtu vāmavaḥ
प्र स॒प्तव॑ध्रिरा॒शसा॒ धारा॑म॒ग्नेर॑शायत ।
अन्ति॒ षद्भू॑तु वा॒मव॑ः
pra saptavadhrirāśasā dhārāmagneraśāyata |
anti ṣadbhūtu vāmavaḥ
इ॒हा ग॑तं वृषण्वसू शृणु॒तं म॑ इ॒मं हव॑म् ।
अन्ति॒ षद्भू॑तु वा॒मव॑ः
ihā gataṃ vṛṣaṇvasū śṛṇutaṃ ma imaṃ havam |
anti ṣadbhūtu vāmavaḥ
किमि॒दं वां॑ पुराण॒वज्जर॑तोरिव शस्यते ।
अन्ति॒ षद्भू॑तु वा॒मव॑ः
kimidaṃ vāṃ purāṇavajjaratoriva śasyate |
anti ṣadbhūtu vāmavaḥ
स॒मा॒नं वां॑ सजा॒त्यं॑ समा॒नो बन्धु॑रश्विना ।
अन्ति॒ षद्भू॑तु वा॒मव॑ः
samānaṃ vāṃ sajātyaṃ samāno bandhuraśvinā |
anti ṣadbhūtu vāmavaḥ
यो वां॒ रजां॑स्यश्विना॒ रथो॑ वि॒याति॒ रोद॑सी ।
अन्ति॒ षद्भू॑तु वा॒मव॑ः
yo vāṃ rajāṃsyaśvinā ratho viyāti rodasī |
anti ṣadbhūtu vāmavaḥ
आ नो॒ गव्ये॑भि॒रश्व्यै॑ः स॒हस्रै॒रुप॑ गच्छतम् ।
अन्ति॒ षद्भू॑तु वा॒मव॑ः
ā no gavyebhiraśvyaiḥ sahasrairupa gacchatam |
anti ṣadbhūtu vāmavaḥ
मा नो॒ गव्ये॑भि॒रश्व्यै॑ः स॒हस्रे॑भि॒रति॑ ख्यतम् ।
अन्ति॒ षद्भू॑तु वा॒मव॑ः
mā no gavyebhiraśvyaiḥ sahasrebhirati khyatam |
anti ṣadbhūtu vāmavaḥ
अ॒रु॒णप्सु॑रु॒षा अ॑भू॒दक॒र्ज्योति॑रृ॒ताव॑री ।
अन्ति॒ षद्भू॑तु वा॒मव॑ः
aruṇapsuruṣā abhūdakarjyotirṛtāvarī |
anti ṣadbhūtu vāmavaḥ
अ॒श्विना॒ सु वि॒चाक॑शद्वृ॒क्षं प॑रशु॒माँ इ॑व ।
अन्ति॒ षद्भू॑तु वा॒मव॑ः
aśvinā su vicākaśadvṛkṣaṃ paraśumām̐ iva |
anti ṣadbhūtu vāmavaḥ
पुरं॒ न धृ॑ष्ण॒वा रु॑ज कृ॒ष्णया॑ बाधि॒तो वि॒शा ।
अन्ति॒ षद्भू॑तु वा॒मव॑ः
puraṃ na dhṛṣṇavā ruja kṛṣṇayā bādhito viśā |
anti ṣadbhūtu vāmavaḥ
Text source: Wikisource · CC BY-SA 4.0 (Wikisource transcription of a public-domain text)