अच्छा॑ वो अ॒ग्निमव॑से दे॒वं गा॑सि॒ स नो॒ वसु॑ः ।
रास॑त्पु॒त्र ऋ॑षू॒णामृ॒तावा॑ पर्षति द्वि॒षः
acchā vo agnimavase devaṃ gāsi sa no vasuḥ |
rāsatputra ṛṣūṇāmṛtāvā parṣati dviṣaḥ
Mandala 5
Sukta 25: Agni carries us like a boat
Rishi: वसूयव आत्रेयाः · Devata: अग्निः · Metre: अनुष्टुप्
9 verses · 25 of 87
What happens in this chapter
Agni carries us like a boat
The Vasuyus of the Atri family, seekers of wealth, praise Agni in anushtubh. Sing to Agni for help; he is good, and the son of the rishis will give. Even the devas of old kindled him, the true hotar with a pleasing tongue. Agni rules among the devas and has entered mortals; he carries the offerings. He gives the worshipper a famed son, a victorious lord and a swift, unconquered horse. His flames roar like the pressing stone, like thunder from the sky. The last mantra asks him to carry us past all enemies as a boat carries over water.
स हि स॒त्यो यं पूर्वे॑ चिद्दे॒वास॑श्चि॒द्यमी॑धि॒रे ।
होता॑रं म॒न्द्रजि॑ह्व॒मित्सु॑दी॒तिभि॑र्वि॒भाव॑सुम्
sa hi satyo yaṃ pūrve ciddevāsaścidyamīdhire |
hotāraṃ mandrajihvamitsudītibhirvibhāvasum
स नो॑ धी॒ती वरि॑ष्ठया॒ श्रेष्ठ॑या च सुम॒त्या ।
अग्ने॑ रा॒यो दि॑दीहि नः सुवृ॒क्तिभि॑र्वरेण्य
sa no dhītī variṣṭhayā śreṣṭhayā ca sumatyā |
agne rāyo didīhi naḥ suvṛktibhirvareṇya
अ॒ग्निर्दे॒वेषु॑ राजत्य॒ग्निर्मर्ते॑ष्वावि॒शन् ।
अ॒ग्निर्नो॑ हव्य॒वाह॑नो॒ऽग्निं धी॒भिः स॑पर्यत
agnirdeveṣu rājatyagnirmarteṣvāviśan |
agnirno havyavāhano'gniṃ dhībhiḥ saparyata
अ॒ग्निस्तु॒विश्र॑वस्तमं तु॒विब्र॑ह्माणमुत्त॒मम् ।
अ॒तूर्तं॑ श्राव॒यत्प॑तिं पु॒त्रं द॑दाति दा॒शुषे॑
agnistuviśravastamaṃ tuvibrahmāṇamuttamam |
atūrtaṃ śrāvayatpatiṃ putraṃ dadāti dāśuṣe
अ॒ग्निर्द॑दाति॒ सत्प॑तिं सा॒साह॒ यो यु॒धा नृभि॑ः ।
अ॒ग्निरत्यं॑ रघु॒ष्यदं॒ जेता॑र॒मप॑राजितम्
agnirdadāti satpatiṃ sāsāha yo yudhā nṛbhiḥ |
agniratyaṃ raghuṣyadaṃ jetāramaparājitam
यद्वाहि॑ष्ठं॒ तद॒ग्नये॑ बृ॒हद॑र्च विभावसो ।
महि॑षीव॒ त्वद्र॒यिस्त्वद्वाजा॒ उदी॑रते
yadvāhiṣṭhaṃ tadagnaye bṛhadarca vibhāvaso |
mahiṣīva tvadrayistvadvājā udīrate
तव॑ द्यु॒मन्तो॑ अ॒र्चयो॒ ग्रावे॑वोच्यते बृ॒हत् ।
उ॒तो ते॑ तन्य॒तुर्य॑था स्वा॒नो अ॑र्त॒ त्मना॑ दि॒वः
tava dyumanto arcayo grāvevocyate bṛhat |
uto te tanyaturyathā svāno arta tmanā divaḥ
ए॒वाँ अ॒ग्निं व॑सू॒यव॑ः सहसा॒नं व॑वन्दिम ।
स नो॒ विश्वा॒ अति॒ द्विष॒ः पर्ष॑न्ना॒वेव॑ सु॒क्रतु॑ः
evām̐ agniṃ vasūyavaḥ sahasānaṃ vavandima |
sa no viśvā ati dviṣaḥ parṣannāveva sukratuḥ
Text source: Wikisource · CC BY-SA 4.0 (Wikisource transcription of a public-domain text)