Rishi: ऋषभो वैश्वामित्रः · Devata: अग्निः · Metre: त्रिष्टुप्
7 verses · 14 of 62
Rishabha Vaishvamitra's trishtubh hymn to Agni. The joyful hotar, true and wisest, has come to the rites: son of strength, with a chariot of lightning and hair of flame, spreading his might on earth. The rishi offers his salutation and asks Agni to bring the knowing devas and sit on the barhis. Dawn and Night run to him along the paths of the wind. Mitra, Varuna and all the Maruts sang to him when he stood spreading his light like the sun. With upturned hands, in reverence, the singers offer their wish; the rishi asks for wealth in thousands and that Agni enjoy all they have done.
आ होता॑ म॒न्द्रो वि॒दथा॑न्यस्थात्स॒त्यो यज्वा॑ क॒वित॑म॒ः स वे॒धाः ।
वि॒द्युद्र॑थ॒ः सह॑सस्पु॒त्रो अ॒ग्निः शो॒चिष्के॑शः पृथि॒व्यां पाजो॑ अश्रेत्
ā hotā mandro vidathānyasthātsatyo yajvā kavitamaḥ sa vedhāḥ |
vidyudrathaḥ sahasasputro agniḥ śociṣkeśaḥ pṛthivyāṃ pājo aśret
अया॑मि ते॒ नम॑उक्तिं जुषस्व॒ ऋता॑व॒स्तुभ्यं॒ चेत॑ते सहस्वः ।
वि॒द्वाँ आ व॑क्षि वि॒दुषो॒ नि ष॑त्सि॒ मध्य॒ आ ब॒र्हिरू॒तये॑ यजत्र
ayāmi te namauktiṃ juṣasva ṛtāvastubhyaṃ cetate sahasvaḥ |
vidvām̐ ā vakṣi viduṣo ni ṣatsi madhya ā barhirūtaye yajatra
द्रव॑तां त उ॒षसा॑ वा॒जय॑न्ती॒ अग्ने॒ वात॑स्य प॒थ्या॑भि॒रच्छ॑ ।
यत्सी॑म॒ञ्जन्ति॑ पू॒र्व्यं ह॒विर्भि॒रा व॒न्धुरे॑व तस्थतुर्दुरो॒णे
dravatāṃ ta uṣasā vājayantī agne vātasya pathyābhiraccha |
yatsīmañjanti pūrvyaṃ havirbhirā vandhureva tasthaturduroṇe
मि॒त्रश्च॒ तुभ्यं॒ वरु॑णः सह॒स्वोऽग्ने॒ विश्वे॑ म॒रुत॑ः सु॒म्नम॑र्चन् ।
यच्छो॒चिषा॑ सहसस्पुत्र॒ तिष्ठा॑ अ॒भि क्षि॒तीः प्र॒थय॒न्सूर्यो॒ नॄन्
mitraśca tubhyaṃ varuṇaḥ sahasvo'gne viśve marutaḥ sumnamarcan |
yacchociṣā sahasasputra tiṣṭhā abhi kṣitīḥ prathayansūryo nṝn
व॒यं ते॑ अ॒द्य र॑रि॒मा हि काम॑मुत्ता॒नह॑स्ता॒ नम॑सोप॒सद्य॑ ।
यजि॑ष्ठेन॒ मन॑सा यक्षि दे॒वानस्रे॑धता॒ मन्म॑ना॒ विप्रो॑ अग्ने
vayaṃ te adya rarimā hi kāmamuttānahastā namasopasadya |
yajiṣṭhena manasā yakṣi devānasredhatā manmanā vipro agne
त्वद्धि पु॑त्र सहसो॒ वि पू॒र्वीर्दे॒वस्य॒ यन्त्यू॒तयो॒ वि वाजा॑ः ।
त्वं दे॑हि सह॒स्रिणं॑ र॒यिं नो॑ऽद्रो॒घेण॒ वच॑सा स॒त्यम॑ग्ने
tvaddhi putra sahaso vi pūrvīrdevasya yantyūtayo vi vājāḥ |
tvaṃ dehi sahasriṇaṃ rayiṃ no'drogheṇa vacasā satyamagne
तुभ्यं॑ दक्ष कविक्रतो॒ यानी॒मा देव॒ मर्ता॑सो अध्व॒रे अक॑र्म ।
त्वं विश्व॑स्य सु॒रथ॑स्य बोधि॒ सर्वं॒ तद॑ग्ने अमृत स्वदे॒ह
tubhyaṃ dakṣa kavikrato yānīmā deva martāso adhvare akarma |
tvaṃ viśvasya surathasya bodhi sarvaṃ tadagne amṛta svadeha
Text source: Wikisource · CC BY-SA 4.0 (Wikisource transcription of a public-domain text)
