इ॒दं त॒ एकं॑ प॒र ऊ॑ त॒ एकं॑ तृ॒तीये॑न॒ ज्योति॑षा॒ सं वि॑शस्व ।
सं॒वेश॑ने त॒न्व१॒॑श्चारु॑रेधि प्रि॒यो दे॒वानां॑ पर॒मे ज॒नित्रे॑
idaṃ ta ekaṃ para ū ta ekaṃ tṛtīyena jyotiṣā saṃ viśasva |
saṃveśane tanvaścāruredhi priyo devānāṃ parame janitre
Mandala 10
Sukta 56: Enter the third light, Vajin
Rishi: बृहदुक्थो वामदेव्यः · Devata: विश्वे देवाः · Metre: त्रिष्टुप्, ४-६ जगती
7 verses · 56 of 191
What happens in this chapter
Enter the third light, Vajin
Brihaduktha Vamadevya addresses the Vishvedevas in Trishtubh and Jagati, and the first verses speak to a departed son called Vajin. This is one light of yours, beyond is another; merge with the third light. Be dear to the devas in their highest birthplace. Go well-sped to heaven, follow the first true laws, follow the devas in their flight. The fathers too shared the devas' greatness and entered bodies again; they set their strength in those who came after, a thread stretched on. As a boat crosses a flood, Brihaduktha has set his line both here and in the worlds beyond.
त॒नूष्टे॑ वाजिन्त॒न्वं१॒॑ नय॑न्ती वा॒मम॒स्मभ्यं॒ धातु॒ शर्म॒ तुभ्य॑म् ।
अह्रु॑तो म॒हो ध॒रुणा॑य दे॒वान्दि॒वी॑व॒ ज्योति॒ः स्वमा मि॑मीयाः
tanūṣṭe vājintanvaṃ nayantī vāmamasmabhyaṃ dhātu śarma tubhyam |
ahruto maho dharuṇāya devāndivīva jyotiḥ svamā mimīyāḥ
वा॒ज्य॑सि॒ वाजि॑नेना सुवे॒नीः सु॑वि॒तः स्तोमं॑ सुवि॒तो दिवं॑ गाः ।
सु॒वि॒तो धर्म॑ प्रथ॒मानु॑ स॒त्या सु॑वि॒तो दे॒वान्सु॑वि॒तोऽनु॒ पत्म॑
vājyasi vājinenā suvenīḥ suvitaḥ stomaṃ suvito divaṃ gāḥ |
suvito dharma prathamānu satyā suvito devānsuvito'nu patma
म॒हि॒म्न ए॑षां पि॒तर॑श्च॒नेशि॑रे दे॒वा दे॒वेष्व॑दधु॒रपि॒ क्रतु॑म् ।
सम॑विव्यचुरु॒त यान्यत्वि॑षु॒रैषां॑ त॒नूषु॒ नि वि॑विशु॒ः पुन॑ः
mahimna eṣāṃ pitaraścaneśire devā deveṣvadadhurapi kratum |
samavivyacuruta yānyatviṣuraiṣāṃ tanūṣu ni viviśuḥ punaḥ
सहो॑भि॒र्विश्वं॒ परि॑ चक्रमू॒ रज॒ः पूर्वा॒ धामा॒न्यमि॑ता॒ मिमा॑नाः ।
त॒नूषु॒ विश्वा॒ भुव॑ना॒ नि ये॑मिरे॒ प्रासा॑रयन्त पुरु॒ध प्र॒जा अनु॑
sahobhirviśvaṃ pari cakramū rajaḥ pūrvā dhāmānyamitā mimānāḥ |
tanūṣu viśvā bhuvanā ni yemire prāsārayanta purudha prajā anu
द्विधा॑ सू॒नवोऽसु॑रं स्व॒र्विद॒मास्था॑पयन्त तृ॒तीये॑न॒ कर्म॑णा ।
स्वां प्र॒जां पि॒तर॒ः पित्र्यं॒ सह॒ आव॑रेष्वदधु॒स्तन्तु॒मात॑तम्
dvidhā sūnavo'suraṃ svarvidamāsthāpayanta tṛtīyena karmaṇā |
svāṃ prajāṃ pitaraḥ pitryaṃ saha āvareṣvadadhustantumātatam
ना॒वा न क्षोद॑ः प्र॒दिश॑ः पृथि॒व्याः स्व॒स्तिभि॒रति॑ दु॒र्गाणि॒ विश्वा॑ ।
स्वां प्र॒जां बृ॒हदु॑क्थो महि॒त्वाव॑रेष्वदधा॒दा परे॑षु
nāvā na kṣodaḥ pradiśaḥ pṛthivyāḥ svastibhirati durgāṇi viśvā |
svāṃ prajāṃ bṛhaduktho mahitvāvareṣvadadhādā pareṣu
Text source: Wikisource · CC BY-SA 4.0 (Wikisource transcription of a public-domain text)