Rishi: बृहदुक्थो वामदेव्यः · Devata: इन्द्रः · Metre: त्रिष्टुप्
8 verses · 55 of 191
Brihaduktha Vamadevya continues in Trishtubh. Far away is that hidden name which the frightened worlds called upon; you propped up earth and sky. Great is that secret name, longed for by many, by which you brought forth what was and what will be. Indra filled both worlds and the mid-space and looks out with thirty-four lights. The best-known verse: see the deva's poetry in its greatness; the grey-haired one swallowed the youth who fought many, and he who died yesterday lives today. Indra, the strong bird without a nest, is truthful; whatever he resolves is never in vain.
दू॒रे तन्नाम॒ गुह्यं॑ परा॒चैर्यत्त्वा॑ भी॒ते अह्व॑येतां वयो॒धै ।
उद॑स्तभ्नाः पृथि॒वीं द्याम॒भीके॒ भ्रातु॑ः पु॒त्रान्म॑घवन्तित्विषा॒णः
dūre tannāma guhyaṃ parācairyattvā bhīte ahvayetāṃ vayodhai |
udastabhnāḥ pṛthivīṃ dyāmabhīke bhrātuḥ putrānmaghavantitviṣāṇaḥ
म॒हत्तन्नाम॒ गुह्यं॑ पुरु॒स्पृग्येन॑ भू॒तं ज॒नयो॒ येन॒ भव्य॑म् ।
प्र॒त्नं जा॒तं ज्योति॒र्यद॑स्य प्रि॒यं प्रि॒याः सम॑विशन्त॒ पञ्च॑
mahattannāma guhyaṃ puruspṛgyena bhūtaṃ janayo yena bhavyam |
pratnaṃ jātaṃ jyotiryadasya priyaṃ priyāḥ samaviśanta pañca
आ रोद॑सी अपृणा॒दोत मध्यं॒ पञ्च॑ दे॒वाँ ऋ॑तु॒शः स॒प्तस॑प्त ।
चतु॑स्त्रिंशता पुरु॒धा वि च॑ष्टे॒ सरू॑पेण॒ ज्योति॑षा॒ विव्र॑तेन
ā rodasī apṛṇādota madhyaṃ pañca devām̐ ṛtuśaḥ saptasapta |
catustriṃśatā purudhā vi caṣṭe sarūpeṇa jyotiṣā vivratena
यदु॑ष॒ औच्छ॑ः प्रथ॒मा वि॒भाना॒मज॑नयो॒ येन॑ पु॒ष्टस्य॑ पु॒ष्टम् ।
यत्ते॑ जामि॒त्वमव॑रं॒ पर॑स्या म॒हन्म॑ह॒त्या अ॑सुर॒त्वमेक॑म्
yaduṣa aucchaḥ prathamā vibhānāmajanayo yena puṣṭasya puṣṭam |
yatte jāmitvamavaraṃ parasyā mahanmahatyā asuratvamekam
वि॒धुं द॑द्रा॒णं सम॑ने बहू॒नां युवा॑नं॒ सन्तं॑ पलि॒तो ज॑गार ।
दे॒वस्य॑ पश्य॒ काव्यं॑ महि॒त्वाद्या म॒मार॒ स ह्यः समा॑न
vidhuṃ dadrāṇaṃ samane bahūnāṃ yuvānaṃ santaṃ palito jagāra |
devasya paśya kāvyaṃ mahitvādyā mamāra sa hyaḥ samāna
शाक्म॑ना शा॒को अ॑रु॒णः सु॑प॒र्ण आ यो म॒हः शूर॑ः स॒नादनी॑ळः ।
यच्चि॒केत॑ स॒त्यमित्तन्न मोघं॒ वसु॑ स्पा॒र्हमु॒त जेतो॒त दाता॑
śākmanā śāko aruṇaḥ suparṇa ā yo mahaḥ śūraḥ sanādanīḻaḥ |
yacciketa satyamittanna moghaṃ vasu spārhamuta jetota dātā
ऐभि॑र्ददे॒ वृष्ण्या॒ पौंस्या॑नि॒ येभि॒रौक्ष॑द्वृत्र॒हत्या॑य व॒ज्री ।
ये कर्म॑णः क्रि॒यमा॑णस्य म॒ह्न ऋ॑तेक॒र्ममु॒दजा॑यन्त दे॒वाः
aibhirdade vṛṣṇyā pauṃsyāni yebhiraukṣadvṛtrahatyāya vajrī |
ye karmaṇaḥ kriyamāṇasya mahna ṛtekarmamudajāyanta devāḥ
यु॒जा कर्मा॑णि ज॒नय॑न्वि॒श्वौजा॑ अशस्ति॒हा वि॒श्वम॑नास्तुरा॒षाट् ।
पी॒त्वी सोम॑स्य दि॒व आ वृ॑धा॒नः शूरो॒ निर्यु॒धाध॑म॒द्दस्यू॑न्
yujā karmāṇi janayanviśvaujā aśastihā viśvamanāsturāṣāṭ |
pītvī somasya diva ā vṛdhānaḥ śūro niryudhādhamaddasyūn
Text source: Wikisource · CC BY-SA 4.0 (Wikisource transcription of a public-domain text)
