समि॑द्धश्चि॒त्समि॑ध्यसे दे॒वेभ्यो॑ हव्यवाहन ।
आ॒दि॒त्यै रु॒द्रैर्वसु॑भिर्न॒ आ ग॑हि मृळी॒काय॑ न॒ आ ग॑हि
samiddhaścitsamidhyase devebhyo havyavāhana |
ādityai rudrairvasubhirna ā gahi mṛḻīkāya na ā gahi
Mandala 10
Sukta 150: Agni called for mercy and grace
Rishi: मृडीको वासिष्ठः · Devata: अग्निः · Metre: बृहती, ४-५ उपरिष्टाज्ज्योतिः, ४ जगती वा
5 verses · 150 of 191
What happens in this chapter
Agni called for mercy and grace
Mrilika Vasishtha praises Agni in brihati and related metres, and every verse turns on mrilika, grace. Kindled, bearer of offerings to the devas, come with the Adityas, Rudras and Vasus; come for our grace. Accept this yajna and this word; we mortals call you as we kindle you. I praise Jatavedas, desired by all; bring the devas who love their vows. Agni became the purohita of the devas; men and rishis kindled him. Agni helped Atri, Bharadvaja, Gavishthira, Kanva and Trasadasyu in battle, and Vasishtha the purohita calls him for grace. The sukta is a short, steady plea for Agni's kindness.
इ॒मं य॒ज्ञमि॒दं वचो॑ जुजुषा॒ण उ॒पाग॑हि ।
मर्ता॑सस्त्वा समिधान हवामहे मृळी॒काय॑ हवामहे
imaṃ yajñamidaṃ vaco jujuṣāṇa upāgahi |
martāsastvā samidhāna havāmahe mṛḻīkāya havāmahe
त्वामु॑ जा॒तवे॑दसं वि॒श्ववा॑रं गृणे धि॒या ।
अग्ने॑ दे॒वाँ आ व॑ह नः प्रि॒यव्र॑तान्मृळी॒काय॑ प्रि॒यव्र॑तान्
tvāmu jātavedasaṃ viśvavāraṃ gṛṇe dhiyā |
agne devām̐ ā vaha naḥ priyavratānmṛḻīkāya priyavratān
अ॒ग्निर्दे॒वो दे॒वाना॑मभवत्पु॒रोहि॑तो॒ऽग्निं म॑नु॒ष्या॒३॒॑ ऋष॑य॒ः समी॑धिरे ।
अ॒ग्निं म॒हो धन॑साताव॒हं हु॑वे मृळी॒कं धन॑सातये
agnirdevo devānāmabhavatpurohito'gniṃ manuṣyā ṛṣayaḥ samīdhire |
agniṃ maho dhanasātāvahaṃ huve mṛḻīkaṃ dhanasātaye
अ॒ग्निरत्रिं॑ भ॒रद्वा॑जं॒ गवि॑ष्ठिरं॒ प्राव॑न्न॒ः कण्वं॑ त्र॒सद॑स्युमाह॒वे ।
अ॒ग्निं वसि॑ष्ठो हवते पु॒रोहि॑तो मृळी॒काय॑ पु॒रोहि॑तः
agniratriṃ bharadvājaṃ gaviṣṭhiraṃ prāvannaḥ kaṇvaṃ trasadasyumāhave |
agniṃ vasiṣṭho havate purohito mṛḻīkāya purohitaḥ
Text source: Wikisource · CC BY-SA 4.0 (Wikisource transcription of a public-domain text)