ऐभि॑रग्ने॒ दुवो॒ गिरो॒ विश्वे॑भि॒ः सोम॑पीतये ।
दे॒वेभि॑र्याहि॒ यक्षि॑ च
aibhiragne duvo giro viśvebhiḥ somapītaye |
devebhiryāhi yakṣi ca
Mandala 1
Sukta 14: Agni, come with all the gods
Rishi: मेधातिथिः काण्वः · Devata: विश्वे देवाः (विश्वैर्देवैः सहितोऽग्निः), ३ इन्द्रवायुबृहस्पतिमित्रग्निपूषभगादित्यमरुद्गणाः, १० विश्वदेवाग्नीन्द्रवायुमित्रधामानि, ११ अग्निः · Metre: गायत्री
12 verses · 14 of 191
What happens in this chapter
Agni, come with all the gods
The Kanvas have called you, Agni; come with all the gods to drink the Soma. Medhatithi Kanva names them in gayatri: Indra and Vayu, Brihaspati, Mitra, Agni, Pushan, Bhaga, the Adityas and the troop of Maruts. The gladdening drops are brought, honey settled in the bowls. Agni is asked to bring the gods who wake at dawn from the bright sphere of the sun, and to give them, with their wives, the honey to drink with his fair tongue. He sits as hotar set down by Manu. The last verse asks him to yoke his ruddy, tawny, red mares and bring the gods here.
आ त्वा॒ कण्वा॑ अहूषत गृ॒णन्ति॑ विप्र ते॒ धिय॑ः ।
दे॒वेभि॑रग्न॒ आ ग॑हि
ā tvā kaṇvā ahūṣata gṛṇanti vipra te dhiyaḥ |
devebhiragna ā gahi
इ॒न्द्र॒वा॒यू बृह॒स्पतिं॑ मि॒त्राग्निं पू॒षणं॒ भग॑म् ।
आ॒दि॒त्यान्मारु॑तं ग॒णम्
indravāyū bṛhaspatiṃ mitrāgniṃ pūṣaṇaṃ bhagam |
ādityānmārutaṃ gaṇam
प्र वो॑ भ्रियन्त॒ इन्द॑वो मत्स॒रा मा॑दयि॒ष्णव॑ः ।
द्र॒प्सा मध्व॑श्चमू॒षद॑ः
pra vo bhriyanta indavo matsarā mādayiṣṇavaḥ |
drapsā madhvaścamūṣadaḥ
ईळ॑ते॒ त्वाम॑व॒स्यव॒ः कण्वा॑सो वृ॒क्तब॑र्हिषः ।
ह॒विष्म॑न्तो अरं॒कृत॑ः
īḻate tvāmavasyavaḥ kaṇvāso vṛktabarhiṣaḥ |
haviṣmanto araṃkṛtaḥ
घृ॒तपृ॑ष्ठा मनो॒युजो॒ ये त्वा॒ वह॑न्ति॒ वह्न॑यः ।
आ दे॒वान्सोम॑पीतये
ghṛtapṛṣṭhā manoyujo ye tvā vahanti vahnayaḥ |
ā devānsomapītaye
तान्यज॑त्राँ ऋता॒वृधोऽग्ने॒ पत्नी॑वतस्कृधि ।
मध्व॑ः सुजिह्व पायय
tānyajatrām̐ ṛtāvṛdho'gne patnīvataskṛdhi |
madhvaḥ sujihva pāyaya
ये यज॑त्रा॒ य ईड्या॒स्ते ते॑ पिबन्तु जि॒ह्वया॑ ।
मधो॑रग्ने॒ वष॑ट्कृति
ye yajatrā ya īḍyāste te pibantu jihvayā |
madhoragne vaṣaṭkṛti
आकीं॒ सूर्य॑स्य रोच॒नाद्विश्वा॑न्दे॒वाँ उ॑ष॒र्बुध॑ः ।
विप्रो॒ होते॒ह व॑क्षति
ākīṃ sūryasya rocanādviśvāndevām̐ uṣarbudhaḥ |
vipro hoteha vakṣati
विश्वे॑भिः सो॒म्यं मध्वग्न॒ इन्द्रे॑ण वा॒युना॑ ।
पिबा॑ मि॒त्रस्य॒ धाम॑भिः
viśvebhiḥ somyaṃ madhvagna indreṇa vāyunā |
pibā mitrasya dhāmabhiḥ
त्वं होता॒ मनु॑र्हि॒तोऽग्ने॑ य॒ज्ञेषु॑ सीदसि ।
सेमं नो॑ अध्व॒रं य॑ज
tvaṃ hotā manurhito'gne yajñeṣu sīdasi |
semaṃ no adhvaraṃ yaja
यु॒क्ष्वा ह्यरु॑षी॒ रथे॑ ह॒रितो॑ देव रो॒हित॑ः ।
ताभि॑र्दे॒वाँ इ॒हा व॑ह
yukṣvā hyaruṣī rathe harito deva rohitaḥ |
tābhirdevām̐ ihā vaha
Text source: Wikisource · CC BY-SA 4.0 (Wikisource transcription of a public-domain text)