सूक्त 76: मरुतों के सखा इन्द्र सोम पीते हैं

इ॒मं नु मा॒यिनं॑ हुव॒ इन्द्र॒मीशा॑न॒मोज॑सा ।
म॒रुत्व॑न्तं॒ न वृ॒ञ्जसे॑

imaṃ nu māyinaṃ huva indramīśānamojasā |
marutvantaṃ na vṛñjase

अ॒यमिन्द्रो॑ म॒रुत्स॑खा॒ वि वृ॒त्रस्या॑भिन॒च्छिर॑ः ।
वज्रे॑ण श॒तप॑र्वणा

ayamindro marutsakhā vi vṛtrasyābhinacchiraḥ |
vajreṇa śataparvaṇā

वा॒वृ॒धा॒नो म॒रुत्स॒खेन्द्रो॒ वि वृ॒त्रमै॑रयत् ।
सृ॒जन्स॑मु॒द्रिया॑ अ॒पः

vāvṛdhāno marutsakhendro vi vṛtramairayat |
sṛjansamudriyā apaḥ

अ॒यं ह॒ येन॒ वा इ॒दं स्व॑र्म॒रुत्व॑ता जि॒तम् ।
इन्द्रे॑ण॒ सोम॑पीतये

ayaṃ ha yena vā idaṃ svarmarutvatā jitam |
indreṇa somapītaye

म॒रुत्व॑न्तमृजी॒षिण॒मोज॑स्वन्तं विर॒प्शिन॑म् ।
इन्द्रं॑ गी॒र्भिर्ह॑वामहे

marutvantamṛjīṣiṇamojasvantaṃ virapśinam |
indraṃ gīrbhirhavāmahe

इन्द्रं॑ प्र॒त्नेन॒ मन्म॑ना म॒रुत्व॑न्तं हवामहे ।
अ॒स्य सोम॑स्य पी॒तये॑

indraṃ pratnena manmanā marutvantaṃ havāmahe |
asya somasya pītaye

म॒रुत्वाँ॑ इन्द्र मीढ्व॒ः पिबा॒ सोमं॑ शतक्रतो ।
अ॒स्मिन्य॒ज्ञे पु॑रुष्टुत

marutvām̐ indra mīḍhvaḥ pibā somaṃ śatakrato |
asminyajñe puruṣṭuta

तुभ्येदि॑न्द्र म॒रुत्व॑ते सु॒ताः सोमा॑सो अद्रिवः ।
हृ॒दा हू॑यन्त उ॒क्थिन॑ः

tubhyedindra marutvate sutāḥ somāso adrivaḥ |
hṛdā hūyanta ukthinaḥ

पिबेदि॑न्द्र म॒रुत्स॑खा सु॒तं सोमं॒ दिवि॑ष्टिषु ।
वज्रं॒ शिशा॑न॒ ओज॑सा

pibedindra marutsakhā sutaṃ somaṃ diviṣṭiṣu |
vajraṃ śiśāna ojasā

उ॒त्तिष्ठ॒न्नोज॑सा स॒ह पी॒त्वी शिप्रे॑ अवेपयः ।
सोम॑मिन्द्र च॒मू सु॒तम्

uttiṣṭhannojasā saha pītvī śipre avepayaḥ |
somamindra camū sutam

अनु॑ त्वा॒ रोद॑सी उ॒भे क्रक्ष॑माणमकृपेताम् ।
इन्द्र॒ यद्द॑स्यु॒हाभ॑वः

anu tvā rodasī ubhe krakṣamāṇamakṛpetām |
indra yaddasyuhābhavaḥ

वाच॑म॒ष्टाप॑दीम॒हं नव॑स्रक्तिमृत॒स्पृश॑म् ।
इन्द्रा॒त्परि॑ त॒न्वं॑ ममे

vācamaṣṭāpadīmahaṃ navasraktimṛtaspṛśam |
indrātpari tanvaṃ mame