सूक्त 94: इन्द्र और अग्नि की गायत्री स्तुति

इ॒यं वा॑म॒स्य मन्म॑न॒ इन्द्रा॑ग्नी पू॒र्व्यस्तु॑तिः ।
अ॒भ्राद्वृ॒ष्टिरि॑वाजनि

iyaṃ vāmasya manmana indrāgnī pūrvyastutiḥ |
abhrādvṛṣṭirivājani

शृ॒णु॒तं ज॑रि॒तुर्हव॒मिन्द्रा॑ग्नी॒ वन॑तं॒ गिर॑ः ।
ई॒शा॒ना पि॑प्यतं॒ धिय॑ः

śṛṇutaṃ jariturhavamindrāgnī vanataṃ giraḥ |
īśānā pipyataṃ dhiyaḥ

मा पा॑प॒त्वाय॑ नो न॒रेन्द्रा॑ग्नी॒ माभिश॑स्तये ।
मा नो॑ रीरधतं नि॒दे

mā pāpatvāya no narendrāgnī mābhiśastaye |
mā no rīradhataṃ nide

इन्द्रे॑ अ॒ग्ना नमो॑ बृ॒हत्सु॑वृ॒क्तिमेर॑यामहे ।
धि॒या धेना॑ अव॒स्यव॑ः

indre agnā namo bṛhatsuvṛktimerayāmahe |
dhiyā dhenā avasyavaḥ

ता हि शश्व॑न्त॒ ईळ॑त इ॒त्था विप्रा॑स ऊ॒तये॑ ।
स॒बाधो॒ वाज॑सातये

tā hi śaśvanta īḻata itthā viprāsa ūtaye |
sabādho vājasātaye

ता वां॑ गी॒र्भिर्वि॑प॒न्यव॒ः प्रय॑स्वन्तो हवामहे ।
मे॒धसा॑ता सनि॒ष्यव॑ः

tā vāṃ gīrbhirvipanyavaḥ prayasvanto havāmahe |
medhasātā saniṣyavaḥ

इन्द्रा॑ग्नी॒ अव॒सा ग॑तम॒स्मभ्यं॑ चर्षणीसहा ।
मा नो॑ दु॒ःशंस॑ ईशत

indrāgnī avasā gatamasmabhyaṃ carṣaṇīsahā |
mā no duḥśaṃsa īśata

मा कस्य॑ नो॒ अर॑रुषो धू॒र्तिः प्रण॒ङ्मर्त्य॑स्य ।
इन्द्रा॑ग्नी॒ शर्म॑ यच्छतम्

mā kasya no araruṣo dhūrtiḥ praṇaṅmartyasya |
indrāgnī śarma yacchatam

गोम॒द्धिर॑ण्यव॒द्वसु॒ यद्वा॒मश्वा॑व॒दीम॑हे ।
इन्द्रा॑ग्नी॒ तद्व॑नेमहि

gomaddhiraṇyavadvasu yadvāmaśvāvadīmahe |
indrāgnī tadvanemahi

यत्सोम॒ आ सु॒ते नर॑ इन्द्रा॒ग्नी अजो॑हवुः ।
सप्ती॑वन्ता सप॒र्यव॑ः

yatsoma ā sute nara indrāgnī ajohavuḥ |
saptīvantā saparyavaḥ

उ॒क्थेभि॑र्वृत्र॒हन्त॑मा॒ या म॑न्दा॒ना चि॒दा गि॒रा ।
आ॒ङ्गू॒षैरा॒विवा॑सतः

ukthebhirvṛtrahantamā yā mandānā cidā girā |
āṅgūṣairāvivāsataḥ

ताविद्दु॒ःशंसं॒ मर्त्यं॒ दुर्वि॑द्वांसं रक्ष॒स्विन॑म् ।
आ॒भो॒गं हन्म॑ना हतमुद॒धिं हन्म॑ना हतम्

tāvidduḥśaṃsaṃ martyaṃ durvidvāṃsaṃ rakṣasvinam |
ābhogaṃ hanmanā hatamudadhiṃ hanmanā hatam