सूक्त 86: मरुद्गण जिसकी रक्षा करें, वह धन्य

मरु॑तो॒ यस्य॒ हि क्षये॑ पा॒था दि॒वो वि॑महसः ।
स सु॑गो॒पात॑मो॒ जन॑ः

maruto yasya hi kṣaye pāthā divo vimahasaḥ |
sa sugopātamo janaḥ

य॒ज्ञैर्वा॑ यज्ञवाहसो॒ विप्र॑स्य वा मती॒नाम् ।
मरु॑तः शृणु॒ता हव॑म्

yajñairvā yajñavāhaso viprasya vā matīnām |
marutaḥ śṛṇutā havam

उ॒त वा॒ यस्य॑ वा॒जिनोऽनु॒ विप्र॒मत॑क्षत ।
स गन्ता॒ गोम॑ति व्र॒जे

uta vā yasya vājino'nu vipramatakṣata |
sa gantā gomati vraje

अ॒स्य वी॒रस्य॑ ब॒र्हिषि॑ सु॒तः सोमो॒ दिवि॑ष्टिषु ।
उ॒क्थं मद॑श्च शस्यते

asya vīrasya barhiṣi sutaḥ somo diviṣṭiṣu |
ukthaṃ madaśca śasyate

अ॒स्य श्रो॑ष॒न्त्वा भुवो॒ विश्वा॒ यश्च॑र्ष॒णीर॒भि ।
सूरं॑ चित्स॒स्रुषी॒रिष॑ः

asya śroṣantvā bhuvo viśvā yaścarṣaṇīrabhi |
sūraṃ citsasruṣīriṣaḥ

पू॒र्वीभि॒र्हि द॑दाशि॒म श॒रद्भि॑र्मरुतो व॒यम् ।
अवो॑भिश्चर्षणी॒नाम्

pūrvībhirhi dadāśima śaradbhirmaruto vayam |
avobhiścarṣaṇīnām

सु॒भग॒ः स प्र॑यज्यवो॒ मरु॑तो अस्तु॒ मर्त्य॑ः ।
यस्य॒ प्रयां॑सि॒ पर्ष॑थ

subhagaḥ sa prayajyavo maruto astu martyaḥ |
yasya prayāṃsi parṣatha

श॒श॒मा॒नस्य॑ वा नर॒ः स्वेद॑स्य सत्यशवसः ।
वि॒दा काम॑स्य॒ वेन॑तः

śaśamānasya vā naraḥ svedasya satyaśavasaḥ |
vidā kāmasya venataḥ

यू॒यं तत्स॑त्यशवस आ॒विष्क॑र्त महित्व॒ना ।
विध्य॑ता वि॒द्युता॒ रक्ष॑ः

yūyaṃ tatsatyaśavasa āviṣkarta mahitvanā |
vidhyatā vidyutā rakṣaḥ

गूह॑ता॒ गुह्यं॒ तमो॒ वि या॑त॒ विश्व॑म॒त्रिण॑म् ।
ज्योति॑ष्कर्ता॒ यदु॒श्मसि॑

gūhatā guhyaṃ tamo vi yāta viśvamatriṇam |
jyotiṣkartā yaduśmasi