अध्याय 44: मनुष्य देह भवसागर की नौका

एहि तन कर फल विषय न भाई । स्वर्गउ स्वल्प अन्त दुखदाई ॥
नर तनु पाइ बिषयँ मन देहीं । पलटि सुधा ते सठ बिष लेहीं ॥

ehi tana kara phala viṣaya na bhāī | svargau svalpa anta dukhadāī ||
nara tanu pāi biṣayam̐ mana dehīṃ | palaṭi sudhā te saṭha biṣa lehīṃ ||

ताहि कबहुँ भल कहइ न कोई । गुञ्जा ग्रहइ परस मनि खोई ॥
आकर चारि लच्छ चौरासी । जोनि भ्रमत यह जिव अबिनासी ॥

tāhi kabahum̐ bhala kahai na koī | guñjā grahai parasa mani khoī ||
ākara cāri laccha caurāsī | joni bhramata yaha jiva abināsī ||

फिरत सदा माया कर प्रेरा । काल कर्म सुभाव गुन घेरा ॥
कबहुँक करि करुना नर-देही । देत ईस बिनु हेतु सनेही ॥

phirata sadā māyā kara prerā | kāla karma subhāva guna gherā ||
kabahum̐ka kari karunā nara-dehī | deta īsa binu hetu sanehī ||

नर तनु भव बारिधि कहुँ बेरो । सन्मुख मरुत अनुग्रह मेरो ॥
करनधार सदगुरु दृढ़ नावा । दुर्लभ साज सुलभ करि पावा ॥

nara tanu bhava bāridhi kahum̐ bero | sanmukha maruta anugraha mero ||
karanadhāra sadaguru dṛr̤ha nāvā | durlabha sāja sulabha kari pāvā ||