अध्याय 26: प्रभु की दिनचर्या और नगर की कथा

प्रातकाल सरजू करि मज्जन । बैठहिँ सभाँ सङ्ग द्विज सज्जन ॥
बेद पुरान बसिष्ठ बखानहिं । सुनहिं राम जद्यपि सब जानहिँ ॥

prātakāla sarajū kari majjana | baiṭhahim̐ sabhām̐ saṅga dvija sajjana ||
beda purāna basiṣṭha bakhānahiṃ | sunahiṃ rāma jadyapi saba jānahim̐ ||

अनुजन्ह संजुत भोजन करहीं । देखि सकल जननीं सुख भरहीं ॥
भरत सत्रुहन दोनउ भाई । सहित पवनसुत उपबन जाई ॥

anujanha saṃjuta bhojana karahīṃ | dekhi sakala jananīṃ sukha bharahīṃ ||
bharata satruhana donau bhāī | sahita pavanasuta upabana jāī ||

बुझहिँ बैठि राम गुन गाहा । कह हनुमान सुमति अवगाहा ॥
सुनत बिमल गुन अति सुख पावहिँ । बहुरि बहुरि करि बिनय कहावहिं ॥

bujhahim̐ baiṭhi rāma guna gāhā | kaha hanumāna sumati avagāhā ||
sunata bimala guna ati sukha pāvahim̐ | bahuri bahuri kari binaya kahāvahiṃ ||

सब कें गृह गृह होहिं पुराना । रामचरित पावन विधि नाना ॥
नर अरु नारि राम गुन गानहिँ । करहिँ दिवस निसि जात न जान ॥

saba keṃ gṛha gṛha hohiṃ purānā | rāmacarita pāvana vidhi nānā ||
nara aru nāri rāma guna gānahim̐ | karahim̐ divasa nisi jāta na jāna ||