अध्याय 2: हनुमान भरत को शुभ समाचार देते हैं

देखत हनूमान अति हरषेउ । पुलक गात लोचन जल बरषेउ ॥
मन महँ बहुत भाँति सुख मानी । बोलेउ श्रवन सुधा सम बानी ॥

dekhata hanūmāna ati haraṣeu | pulaka gāta locana jala baraṣeu ||
mana maham̐ bahuta bhām̐ti sukha mānī | boleu śravana sudhā sama bānī ||

जासु बिरहँ सोचहु दिन राती । रटहु निरन्तर गुन गन पाँती ॥
रघुकुल तिलक सुजन सुख दाता । आयउ कुसल देव मुनि त्राता ॥

jāsu biraham̐ socahu dina rātī | raṭahu nirantara guna gana pām̐tī ||
raghukula tilaka sujana sukha dātā | āyau kusala deva muni trātā ||

रिपु रन जीति सुजस सुर गावत । सीता सहित अनुज प्रभु आवत ॥
सुनत बचन बिसरे सब दूखा । तृषावन्त जिमि पाइ पियूखा ॥

ripu rana jīti sujasa sura gāvata | sītā sahita anuja prabhu āvata ||
sunata bacana bisare saba dūkhā | tṛṣāvanta jimi pāi piyūkhā ||

को तुम्ह तात कहाँ से आये । मोहि परम प्रिय बचन सुनाये ॥
मारुत सुत मैं कपि हनुमाना । नाम मोर सुनु कृपानिधाना ॥

ko tumha tāta kahām̐ se āye | mohi parama priya bacana sunāye ||
māruta suta maiṃ kapi hanumānā | nāma mora sunu kṛpānidhānā ||

दीनबन्धु रघुपति कर किङ्कर । सुनत भरत भेंटेउ उठि सादर ॥
मिलत प्रेम नहिँ हृदयँ माता । नयन स्त्रवत जल पुलकित गाता ॥

dīnabandhu raghupati kara kiṅkara | sunata bharata bheṃṭeu uṭhi sādara ||
milata prema nahim̐ hṛdayam̐ mātā | nayana stravata jala pulakita gātā ||

कपि तव दरस सकल दुख बीते । मिले आजु मोहि राम पिरीते ॥
बार बार बूझी कुसलाता । तो कह देउँ काह सुनु भ्राता ॥

kapi tava darasa sakala dukha bīte | mile āju mohi rāma pirīte ||
bāra bāra būjhī kusalātā | to kaha deum̐ kāha sunu bhrātā ||

एहि सन्देस सरिस जग माहीं । करि बिचार देखेउँ कछु नाहीं ॥
नाहि न तात उरिन में तोही । अब प्रभु चरित सुनावहु मोही ॥

ehi sandesa sarisa jaga māhīṃ | kari bicāra dekheum̐ kachu nāhīṃ ||
nāhi na tāta urina meṃ tohī | aba prabhu carita sunāvahu mohī ||

तब हनुमन्त नाइ पद माथा । कहे सकल रघुपति गुन गाथा ॥
कहु कपि कबहुँ कृपाल गोसाईं । सुमिरहिं मोहि दास की नाँई ॥

taba hanumanta nāi pada māthā | kahe sakala raghupati guna gāthā ||
kahu kapi kabahum̐ kṛpāla gosāīṃ | sumirahiṃ mohi dāsa kī nām̐ī ||