अध्याय 120: राम-भक्ति, सुन्दर चिन्तामणि

कहेउँ ज्ञान सिद्धान्त बुझाई । सुनहु भगति मनि कै प्रभुताई ॥
राम भगति चिन्तामनि सुन्दर । बसइ गरुड़ जाके उर अन्तर ॥

kaheum̐ jñāna siddhānta bujhāī | sunahu bhagati mani kai prabhutāī ||
rāma bhagati cintāmani sundara | basai garur̤a jāke ura antara ||

परम प्रकास रूप दिन राती । नहिँ कछु चहिय दिआ घृत बाती ॥
मोह दरिद्र निकट नहिँ आवा । लोभ बात नहिँ ताहि बुझावा ॥

parama prakāsa rūpa dina rātī | nahim̐ kachu cahiya diā ghṛta bātī ||
moha daridra nikaṭa nahim̐ āvā | lobha bāta nahim̐ tāhi bujhāvā ||

प्रबल अबिद्या तम मिटि जाई । हारहिँ सकल सलभ समुदाई ॥
खल कामादि निकट नहिं जाहीं । बसइ भगति जाके उर माहीं ॥

prabala abidyā tama miṭi jāī | hārahim̐ sakala salabha samudāī ||
khala kāmādi nikaṭa nahiṃ jāhīṃ | basai bhagati jāke ura māhīṃ ||

गरल सुधा सम अरि हित होई । तेहि मनि बिनु सुख पाव न कोई ॥
ब्यापहिँ मानस रोग न मारा । जिन्ह के बस सब जीव दुखारी ॥

garala sudhā sama ari hita hoī | tehi mani binu sukha pāva na koī ||
byāpahim̐ mānasa roga na mārā | jinha ke basa saba jīva dukhārī ||

रामभगति भनि उर बस जाकें । दुख लवलेस न सपनेहुँ ताकें ॥
चतुर सिरोमनि तेइ जग माहीं । जे मनि लागि सुजतन कराहीं ॥

rāmabhagati bhani ura basa jākeṃ | dukha lavalesa na sapanehum̐ tākeṃ ||
catura siromani tei jaga māhīṃ | je mani lāgi sujatana karāhīṃ ||

सो मनि जदपि प्रगट जग अहई । राम कृपा बिनु नहिं कोउ लहई ॥
सुगम उपाय पाइबे केरे । नर हतभाग्य देहिँ भटमेरे ॥

so mani jadapi pragaṭa jaga ahaī | rāma kṛpā binu nahiṃ kou lahaī ||
sugama upāya pāibe kere | nara hatabhāgya dehim̐ bhaṭamere ||

पावन पर्वत बेद पुराना । राम कथा रुचिराकर नाना ॥
मर्मी सज्जन सुमति कुदारी । ज्ञान विराग नयन उरगारी ॥

pāvana parvata beda purānā | rāma kathā rucirākara nānā ||
marmī sajjana sumati kudārī | jñāna virāga nayana uragārī ||

भाव सहित खोजइ जो प्रानी । पाव भगति मनि सब सुख खानी ॥
मोरें मन प्रभु अस बिस्वासा । राम ते अधिक राम कर दासा ॥

bhāva sahita khojai jo prānī | pāva bhagati mani saba sukha khānī ||
moreṃ mana prabhu asa bisvāsā | rāma te adhika rāma kara dāsā ||

राम-सिन्धु-घन सज्जन धीरा । चन्दन तरु हरि सन्त समीरा ॥
अब कर फल हरि भगति सुहाई । सो बिनु सन्त न काहूँ पाई ॥

rāma-sindhu-ghana sajjana dhīrā | candana taru hari santa samīrā ||
aba kara phala hari bhagati suhāī | so binu santa na kāhūm̐ pāī ||

अस बिचारि जोइ कर सतसङ्गा । राम भगति तेहि सुलभ बिहङ्गा ॥

asa bicāri joi kara satasaṅgā | rāma bhagati tehi sulabha bihaṅgā ||