अध्याय 117: विज्ञान का दीपक, बड़े परिश्रम से जला

सुनहु तात यह अकथ कहानी । समुझत बनइ न जाइ बखानी ॥
ईस्वर अंस जीव अबिनासी । चेतन अमल सहज सुख रासी ॥

sunahu tāta yaha akatha kahānī | samujhata banai na jāi bakhānī ||
īsvara aṃsa jīva abināsī | cetana amala sahaja sukha rāsī ||

सेो माया बस भयउ गोसाँई । बँध्यो कीर मर्कट की नाई ॥
जड़ चेतनहिँ ग्रन्थि परि गई । जदपि मृषा छूटत कठिनई ॥

seo māyā basa bhayau gosām̐ī | bam̐dhyo kīra markaṭa kī nāī ||
jar̤a cetanahim̐ granthi pari gaī | jadapi mṛṣā chūṭata kaṭhinaī ||

तब ते जीव भयउ संसारी । छूट न ग्रन्थि न होइ सुखारी ॥
श्रुति पुरान बहु कहेउ उपाई । छूट न अधिक अधिक अरुझाई ॥

taba te jīva bhayau saṃsārī | chūṭa na granthi na hoi sukhārī ||
śruti purāna bahu kaheu upāī | chūṭa na adhika adhika arujhāī ||

जीव हृदयँ तम मोह बिसेखी । ग्रन्थिं छूट किमि परइ न देखी ॥
अस सञ्जोग ईस जब करई । तबहुँ कदाचित सो निरुअरई ॥

jīva hṛdayam̐ tama moha bisekhī | granthiṃ chūṭa kimi parai na dekhī ||
asa sañjoga īsa jaba karaī | tabahum̐ kadācita so niruaraī ||

सात्त्विक श्रद्धा धेनु सुहाई । जौँ हरि कृपाँ हृदयँ बस आई ॥
जप तप ब्रत जम नियम अपारा । जे श्रुति कह सुभ-धरम अचारा ॥

sāttvika śraddhā dhenu suhāī | jaum̐ hari kṛpām̐ hṛdayam̐ basa āī ||
japa tapa brata jama niyama apārā | je śruti kaha subha-dharama acārā ||

तेइ तृन हरित चरै जब गाई । भाव बच्छ-सिसु पाई पेन्हाई ॥
नोई निवृत्ति पात्र बिस्वासा । निर्मल मन अहीर निज दासा ॥

tei tṛna harita carai jaba gāī | bhāva baccha-sisu pāī penhāī ||
noī nivṛtti pātra bisvāsā | nirmala mana ahīra nija dāsā ||

परम धर्ममय पथ दुहि भाई । अवटै अनल अकाम बनाई ॥
तोष मरुत तब छमाँ जुड़ावै । धृति सम जावन देइ जमावै ॥

parama dharmamaya patha duhi bhāī | avaṭai anala akāma banāī ||
toṣa maruta taba chamām̐ jur̤āvai | dhṛti sama jāvana dei jamāvai ||

मुदिताँ मथैं बिचार मथानी । दम अधार रजु सत्य सुबानी ॥
तब मथि काढ़ि लेइ नवनीता । बिमल बिराग सुभग सुपुनीता ॥

muditām̐ mathaiṃ bicāra mathānī | dama adhāra raju satya subānī ||
taba mathi kār̤hi lei navanītā | bimala birāga subhaga supunītā ||