अध्याय 115: गरुड़ का प्रश्न: ज्ञान और भक्ति में भेद

जे असि भगति जानि परिहरहीं । केवल ज्ञान हेतु श्रम करहीँ ॥
ते जड़ कामधेनु गृहँ त्यागी । खोजत आकु फिरहिँ पय लागी ॥

je asi bhagati jāni pariharahīṃ | kevala jñāna hetu śrama karahīm̐ ||
te jar̤a kāmadhenu gṛham̐ tyāgī | khojata āku phirahim̐ paya lāgī ||

सुनु खगेस हरि भगति बिहाई । जे सुख चाहहिँ आन उपाई ॥
ते सठ महासिन्धु बिनु तरनी । पैरि पार चाहहिँ जड़ करनी ॥

sunu khagesa hari bhagati bihāī | je sukha cāhahim̐ āna upāī ||
te saṭha mahāsindhu binu taranī | pairi pāra cāhahim̐ jar̤a karanī ||

सुनि भुसुंडि के बचन भवानी । बोलेउ गरुड़ हरषि मृदु बानी ॥
तव प्रसाद प्रभु मम उर माहीँ । संसय सोक मोह भ्रम नाहीं ॥

suni bhusuṃḍi ke bacana bhavānī | boleu garur̤a haraṣi mṛdu bānī ||
tava prasāda prabhu mama ura māhīm̐ | saṃsaya soka moha bhrama nāhīṃ ||

सुनेउँ पुनीत राम गुन ग्रामा । तुम्हरी कृपाँ लहेउँ बिश्रामा ॥
एक बात प्रभु पूछउँ तोही । कहहु बुझाइ कृपानिधि मोही ॥

suneum̐ punīta rāma guna grāmā | tumharī kṛpām̐ laheum̐ biśrāmā ||
eka bāta prabhu pūchaum̐ tohī | kahahu bujhāi kṛpānidhi mohī ||

कहहिँ सन्त मुनि बेद पुराना । नहिँ कछु दुर्लभ ज्ञान समाना ॥
सोइ मुनि तुम्ह सन कहेउ गोसाँई । नहिं आदरेहु भगति की नाईं ॥

kahahim̐ santa muni beda purānā | nahim̐ kachu durlabha jñāna samānā ||
soi muni tumha sana kaheu gosām̐ī | nahiṃ ādarehu bhagati kī nāīṃ ||

ज्ञानहिं भगतिहि अन्तर केता । सकल कहहु प्रभु कृपा निकेता ॥
सुनि उरगारि बचन सुख माना । सादर बोलेउ काग सुजाना ॥

jñānahiṃ bhagatihi antara ketā | sakala kahahu prabhu kṛpā niketā ||
suni uragāri bacana sukha mānā | sādara boleu kāga sujānā ||

भगतिहि ज्ञानहि नहिँ कछु भेदा । उभय हरहिं भव सम्भव खेदा ॥
नाथ मुनीस कहहिँ कछु अन्तर । सावधान सोउ सुनु बिहंगबर ॥

bhagatihi jñānahi nahim̐ kachu bhedā | ubhaya harahiṃ bhava sambhava khedā ||
nātha munīsa kahahim̐ kachu antara | sāvadhāna sou sunu bihaṃgabara ||

ज्ञान विराग जोग विज्ञाना । ये सब पुरुष सुनहु हरिजानां ॥
पुरुष प्रताप प्रबल सम भाँती । अबला अबल सहज जड़ जाती ॥

jñāna virāga joga vijñānā | ye saba puruṣa sunahu harijānāṃ ||
puruṣa pratāpa prabala sama bhām̐tī | abalā abala sahaja jar̤a jātī ||