अध्याय 114: वरदान पर मुहर, युगों से भुशुण्डि का आश्रम

काल कर्म गुन दोष सुभाऊ । कछु दुख तुम्हहिँ न ब्यापिहि काऊ ॥
राम रहस्य ललित बिधि नाना । गुप्त प्रगट इतिहास पुराना ॥

kāla karma guna doṣa subhāū | kachu dukha tumhahim̐ na byāpihi kāū ||
rāma rahasya lalita bidhi nānā | gupta pragaṭa itihāsa purānā ||

बिनु स्त्रम तुम्ह जानब सब सोऊ । नित नव नेह राम-पद होऊ ॥
जो इच्छा करिहहु मन माहीं । हरि प्रसाद कछु दुर्लभ नाहीं ॥

binu strama tumha jānaba saba soū | nita nava neha rāma-pada hoū ||
jo icchā karihahu mana māhīṃ | hari prasāda kachu durlabha nāhīṃ ||

सुनि मुनि आसिष सुनु मति धीरा । ब्रह्मगिरा भइ गगन गंभीरा ॥
एवमस्तु तव बच मुनि ग्यानी । यह मम भगत करम मन बानी ॥

suni muni āsiṣa sunu mati dhīrā | brahmagirā bhai gagana gaṃbhīrā ||
evamastu tava baca muni gyānī | yaha mama bhagata karama mana bānī ||

सुनि नभगिरा हरष मोहि भयऊ । प्रेम मगन सब संसय गयऊ ॥
करि बिनती मुनि आयसु पाई । पद-सरोज पुनि पुनि सिर नाई ॥

suni nabhagirā haraṣa mohi bhayaū | prema magana saba saṃsaya gayaū ||
kari binatī muni āyasu pāī | pada-saroja puni puni sira nāī ||

हरष सहित एहिं आश्रम आयउँ । प्रभु प्रसाद दुर्लभ घर पायउँ ॥
इहाँ बसत मोहि सुनु खग ईसा । बीते कलप सात अरु बीसा ॥

haraṣa sahita ehiṃ āśrama āyaum̐ | prabhu prasāda durlabha ghara pāyaum̐ ||
ihām̐ basata mohi sunu khaga īsā | bīte kalapa sāta aru bīsā ||

करउँ सदा रघुपति गुन गाना । सादर सुनहिँ बिहङ्ग सुजाना ॥
जब जब अवधपुरीं रघुबीरा । धरहिँ भगत-हित मनुज सरीरा ॥

karaum̐ sadā raghupati guna gānā | sādara sunahim̐ bihaṅga sujānā ||
jaba jaba avadhapurīṃ raghubīrā | dharahim̐ bhagata-hita manuja sarīrā ||

सब तब जाइ राम पुर रहऊँ । सिसुलीला बिलोकि सुख लहऊँ ॥
पुनि उर राखि राम सिसु रूपा । निज आश्रम आवउँ खगभूपा ॥

saba taba jāi rāma pura rahaūm̐ | sisulīlā biloki sukha lahaūm̐ ||
puni ura rākhi rāma sisu rūpā | nija āśrama āvaum̐ khagabhūpā ||

कथा सकल मैं तुम्हहिँ सुनाई । काग-देह जेहिं कारन पाई ॥
कहिउँ तात सब प्रस्न तुम्हारी । राम भगति महिमा अति भारी ॥

kathā sakala maiṃ tumhahim̐ sunāī | kāga-deha jehiṃ kārana pāī ||
kahium̐ tāta saba prasna tumhārī | rāma bhagati mahimā ati bhārī ||