अध्याय 112: लोमश का शाप: बालक काग बना

कबहुँ-कि दुख सब कर हित ताकें । तेहि कि दरिद्र परस मनि जाकें ॥
परद्रोही की होहिँ निसङ्का । कामी पुनि कि रहहिं अकलङ्का ॥

kabahum̐-ki dukha saba kara hita tākeṃ | tehi ki daridra parasa mani jākeṃ ||
paradrohī kī hohim̐ nisaṅkā | kāmī puni ki rahahiṃ akalaṅkā ||

बंस कि रह द्विज अनहित कीन्हें । कर्म कि होहिँ स्वरूपहि चीन्हें ॥
काहू सुमति कि खल संग जामी । सुभ गति पाव कि परत्रिय-गामी ॥

baṃsa ki raha dvija anahita kīnheṃ | karma ki hohim̐ svarūpahi cīnheṃ ||
kāhū sumati ki khala saṃga jāmī | subha gati pāva ki paratriya-gāmī ||

भव कि परहिँ परमात्मा-बिन्दक । सुखी कि होहिं कबहुँ हरिनिंदक ॥
राज कि रहइ नीति बिनु जानें । अघ कि रहहिं हरिचरित बखानें ॥

bhava ki parahim̐ paramātmā-bindaka | sukhī ki hohiṃ kabahum̐ hariniṃdaka ||
rāja ki rahai nīti binu jāneṃ | agha ki rahahiṃ haricarita bakhāneṃ ||

पावन जल कि पुन्य बिनु होई । बिनु अघ अजस कि पावइ कोई ॥
लाभ कि किछु हरि भगति समाना । जेहि गावहिं श्रुति सन्त पुराना ॥

pāvana jala ki punya binu hoī | binu agha ajasa ki pāvai koī ||
lābha ki kichu hari bhagati samānā | jehi gāvahiṃ śruti santa purānā ||

हानि कि जग एहि सम किछु भाई । भजिअ न रामहि नर तनु पाई ॥
अघ कि पिसुनता सम कछु आना । धर्म कि दया सरिस हरिजाना ॥

hāni ki jaga ehi sama kichu bhāī | bhajia na rāmahi nara tanu pāī ||
agha ki pisunatā sama kachu ānā | dharma ki dayā sarisa harijānā ||

एहि बिधि अमित जुगुति मन गुनऊँ । मुनि उपदेस न सादर सुनऊँ ॥
पुनि पुनि सगुन पच्छ में रोपा । सन्न मुनि बाले बचन सकोपा ॥

ehi bidhi amita juguti mana gunaūm̐ | muni upadesa na sādara sunaūm̐ ||
puni puni saguna paccha meṃ ropā | sanna muni bāle bacana sakopā ||

मूढ़ परम सिख देउँ न मानसि । उत्तर प्रतिउत्तर बहु आनसि ॥
सत्य बचन बिस्वास न करही । बायस इव सबही ते डरही ॥

mūr̤ha parama sikha deum̐ na mānasi | uttara pratiuttara bahu ānasi ||
satya bacana bisvāsa na karahī | bāyasa iva sabahī te ḍarahī ||

सठ स्वपच्छ तब हृदयँ विसाला । सपदि होहि पच्छी चंडाला ॥
लीन्ह साप मैं सीस चढ़ाई । नहिँ कछु भय न दीनता आई ॥

saṭha svapaccha taba hṛdayam̐ visālā | sapadi hohi pacchī caṃḍālā ||
līnha sāpa maiṃ sīsa car̤hāī | nahim̐ kachu bhaya na dīnatā āī ||