अध्याय 111: लोमश का निर्गुण उपदेश, बालक का हठ

तब मुनिष रघुपति गुन गाथा । कहे कछुक सादर खगनाथा ॥
ब्रह्मज्ञान रत मुनि विज्ञानी । मोहि परम अधिकारी जानी ॥

taba muniṣa raghupati guna gāthā | kahe kachuka sādara khaganāthā ||
brahmajñāna rata muni vijñānī | mohi parama adhikārī jānī ||

लागे करन ब्रह्म उपदेसा । अज अद्वेत अगुन हृदयेसा ॥
अकल अनीह अनाम अरूपा । अनुभव गम्य अखंड अनूपा ॥

lāge karana brahma upadesā | aja adveta aguna hṛdayesā ||
akala anīha anāma arūpā | anubhava gamya akhaṃḍa anūpā ||

मन गोतीत अमल अबिनासी । निर्विकार निरवधि सुख रासी ॥
सो तैं ताहि तोहि नहिँ भेदा । बारि बीच इव गावहि बेदा ॥

mana gotīta amala abināsī | nirvikāra niravadhi sukha rāsī ||
so taiṃ tāhi tohi nahim̐ bhedā | bāri bīca iva gāvahi bedā ||

बिबिध भाँति मोहि मुनि समुझावा । निर्गुन मत मम हृदयँ न आवा ॥
पुनि मैं कहेउँ नाइ पद सीसा । सगुन उपासन कहहु मुनीसा ॥

bibidha bhām̐ti mohi muni samujhāvā | nirguna mata mama hṛdayam̐ na āvā ||
puni maiṃ kaheum̐ nāi pada sīsā | saguna upāsana kahahu munīsā ||

राम भगति जल मम मन मीना । किमि बिलगाइ मुनीस प्रबीना ॥
सोइ उपदेस काहु करि दाया । निज नयनन्हि देखौं रघुराया ॥

rāma bhagati jala mama mana mīnā | kimi bilagāi munīsa prabīnā ||
soi upadesa kāhu kari dāyā | nija nayananhi dekhauṃ raghurāyā ||

भरि लोचन बिलोकि अवधेसा । तब सुनिहउँ निर्गुन उपदेसा ॥
मुनि पुनि कहि हरिकथा अनूपा । खंडि सगुन मत अगुन निरूपा ॥

bhari locana biloki avadhesā | taba sunihaum̐ nirguna upadesā ||
muni puni kahi harikathā anūpā | khaṃḍi saguna mata aguna nirūpā ||

तब मैं निर्गुन मत करि दूरी । सगुन निरूपउँ करि हठ भूरी ॥
उत्तर प्रतिउत्तर में कीन्हा । मुनि तनु भये क्रोध के चीन्हा ॥

taba maiṃ nirguna mata kari dūrī | saguna nirūpaum̐ kari haṭha bhūrī ||
uttara pratiuttara meṃ kīnhā | muni tanu bhaye krodha ke cīnhā ||

सुनु प्रभु बहुत अवज्ञा किये । उपज क्रोध ज्ञानिन्ह के हिएँ ॥
अति संघरषन जौँ कर कोई । अनल प्रगट चन्दन से होई ॥

sunu prabhu bahuta avajñā kiye | upaja krodha jñāninha ke hiem̐ ||
ati saṃgharaṣana jaum̐ kara koī | anala pragaṭa candana se hoī ||