अध्याय 110: ब्राह्मण बालक की लगन, लोमश तक

त्रिजग देव नर जोइ तनु धरउँ । तहँ तहँ राम भजन अनुसरऊँ ॥
एक सूल मोहि बिसर न काऊ । गुर कर कोमल सील सुभाऊ ॥

trijaga deva nara joi tanu dharaum̐ | taham̐ taham̐ rāma bhajana anusaraūm̐ ||
eka sūla mohi bisara na kāū | gura kara komala sīla subhāū ||

चरम-देह द्विज के मैं पाई । सुर-दुर्लभ पुरान श्रुति गाई ॥
खेलउँ तहाँ बालकन्ह मीला । करउँ सकल रघुनायक लीला ॥

carama-deha dvija ke maiṃ pāī | sura-durlabha purāna śruti gāī ||
khelaum̐ tahām̐ bālakanha mīlā | karaum̐ sakala raghunāyaka līlā ||

प्रौढ़ भएँ मोहि पिता पढ़ावा । समझउँ सुनउँ गुनउँ नहिँ भावा ॥
मन तें सकल बासना भागी । केवल राम चरन लय लागीं ॥

praur̤ha bhaem̐ mohi pitā par̤hāvā | samajhaum̐ sunaum̐ gunaum̐ nahim̐ bhāvā ||
mana teṃ sakala bāsanā bhāgī | kevala rāma carana laya lāgīṃ ||

कहु खगेस अस कवन अभागी । खरी सेव सुरधेनुहि त्यागी ॥
प्रेम मगन मोहि कछु न सोहाई । हारेउ पिता पढ़ाई पढ़ाई ॥

kahu khagesa asa kavana abhāgī | kharī seva suradhenuhi tyāgī ||
prema magana mohi kachu na sohāī | hāreu pitā par̤hāī par̤hāī ||

भये काल बल जब पितु माता । मैं बन गयउँ भजन जनत्राता ॥
जहँ जहँ बिपिन मुनीस्वर पावउँ । आश्रम जाइ जाइ सिरु नावउँ ॥

bhaye kāla bala jaba pitu mātā | maiṃ bana gayaum̐ bhajana janatrātā ||
jaham̐ jaham̐ bipina munīsvara pāvaum̐ | āśrama jāi jāi siru nāvaum̐ ||

बूझत तिन्हहिं राम गुन गाहा । कहहिं सुनउँ हरषित खगनाहा ॥
सुनत फिरउँ हरि गुन अनुबादा । अब्याहत-गति सम्भु प्रसादा ॥

būjhata tinhahiṃ rāma guna gāhā | kahahiṃ sunaum̐ haraṣita khaganāhā ||
sunata phiraum̐ hari guna anubādā | abyāhata-gati sambhu prasādā ||

छूटी त्रिविधि ईषना गाढ़ी । एक लालसा उर अति बाढ़ी ॥
राम-चरन-बारिज जब देखौं । तब निज जन्म सुफल करि लेखौं ॥

chūṭī trividhi īṣanā gār̤hī | eka lālasā ura ati bār̤hī ||
rāma-carana-bārija jaba dekhauṃ | taba nija janma suphala kari lekhauṃ ||

जेहि पूछउँ सोइ मुनि अस कहई । ईस्वर सर्व भूत-सय अहई ॥
निर्गुन मत नहिँ मोहि सुहाई । सगुन ब्रह्म रति उर अधिकाई ॥

jehi pūchaum̐ soi muni asa kahaī | īsvara sarva bhūta-saya ahaī ||
nirguna mata nahim̐ mohi suhāī | saguna brahma rati ura adhikāī ||