अध्याय 45: विभीषण के राम दर्शन और शरण

सादर तेहि आगें करि बानर । चले जहाँ रघुपति करुनाकर ॥
दूरिहि हैं देखेउ दोउ भ्राता । नयनानन्द दान के दाता ॥

sādara tehi āgeṃ kari bānara | cale jahām̐ raghupati karunākara ||
dūrihi haiṃ dekheu dou bhrātā | nayanānanda dāna ke dātā ||

बहुरि राम छवि-धाम बिलोकी । रहेउ ठटुकि एकटक पल रोकी ॥
भुज प्रलम्ब कंजारुन लोचन । स्यामल गात प्रनत भय मोचन ॥

bahuri rāma chavi-dhāma bilokī | raheu ṭhaṭuki ekaṭaka pala rokī ||
bhuja pralamba kaṃjāruna locana | syāmala gāta pranata bhaya mocana ||

सिद्ध कन्ध आयत उर सोहा । आनन अमित मदन मन मोहा ॥
नयन नीर पुलकित अति गाता । मन धरि धीर कही मृदु बाता ॥

siddha kandha āyata ura sohā | ānana amita madana mana mohā ||
nayana nīra pulakita ati gātā | mana dhari dhīra kahī mṛdu bātā ||

नाथ दसानन कर मैं भ्राता । निसिचर बंस जनम सुरत्राता ॥
सहज पापप्रिय तामस देहा । जथा उलूकहि तम पर नेहा ॥

nātha dasānana kara maiṃ bhrātā | nisicara baṃsa janama suratrātā ||
sahaja pāpapriya tāmasa dehā | jathā ulūkahi tama para nehā ||