अध्याय 10: रावण की धमकी और एक मास की अवधि

सीता तैं मम कृत अपमाना । कटिहउँ तव सिर कठिन कृपाना ॥
नाहिँ त सपदि मानु मम बानी । सुमुखि होत न त जीवन हानी ॥

sītā taiṃ mama kṛta apamānā | kaṭihaum̐ tava sira kaṭhina kṛpānā ||
nāhim̐ ta sapadi mānu mama bānī | sumukhi hota na ta jīvana hānī ||

स्याम-सरोज-दाम सम सुन्दर । प्रभु भुज करि कर सम दसकन्धर ॥
सो भुज कंठ कि तव अति घोरा । सुनु सठ अस प्रमान पन मोरा ॥

syāma-saroja-dāma sama sundara | prabhu bhuja kari kara sama dasakandhara ||
so bhuja kaṃṭha ki tava ati ghorā | sunu saṭha asa pramāna pana morā ||

चन्द्रहास हर मम परितापं । रघुपति-बिरह-अनल संजातं ॥
सीतल निसित बहसि बर धारा । कह सीता हरु मम दुख भारा ॥

candrahāsa hara mama paritāpaṃ | raghupati-biraha-anala saṃjātaṃ ||
sītala nisita bahasi bara dhārā | kaha sītā haru mama dukha bhārā ||

सुनत बचन पुनि मारन धावा । मय-तनया कहि नीति बुझावा ॥
कहेसि सकल निसिचरिन्ह बोलाई । सीतहि बहु बिधि त्रासह जाई ॥

sunata bacana puni mārana dhāvā | maya-tanayā kahi nīti bujhāvā ||
kahesi sakala nisicarinha bolāī | sītahi bahu bidhi trāsaha jāī ||

मास-दिवस महँ कहा न माना । तौ मैं मारबि काढ़ि कृपाना ॥

māsa-divasa maham̐ kahā na mānā | tau maiṃ mārabi kār̤hi kṛpānā ||