अध्याय 98: वानरों और जाम्बवान का प्रहार, संध्या तक युद्ध

सिर भुज बाढ़ि देखि रिपु केरी । भालु कपिन्ह रिस भई घनेरी ॥
परत न मूढ़ कटेउ भुज सीसा । धाये कोपि भालु भट कीसा ॥

sira bhuja bār̤hi dekhi ripu kerī | bhālu kapinha risa bhaī ghanerī ||
parata na mūr̤ha kaṭeu bhuja sīsā | dhāye kopi bhālu bhaṭa kīsā ||

बालि-तनय मारुति नल नीला । बानरराज दुबिद बलसीला ॥
बिटप महीधर करहिं प्रहारा । सोइ गिरि तरु गहि कपिन्ह से मारा ॥

bāli-tanaya māruti nala nīlā | bānararāja dubida balasīlā ||
biṭapa mahīdhara karahiṃ prahārā | soi giri taru gahi kapinha se mārā ||

एक नखन्हि रिपु-बपुष-बिदारी । भअगि चलहिँ एक लातन्ह मारी ॥
तब नल नील सिरन्हि चढ़ि गयऊ । नखन्हि लिलार बिदारत भयऊ ॥

eka nakhanhi ripu-bapuṣa-bidārī | bhaagi calahim̐ eka lātanha mārī ||
taba nala nīla siranhi car̤hi gayaū | nakhanhi lilāra bidārata bhayaū ||

रुधिर देखि बिषाद उर भारी । तिन्हहिं धरन कहाँ भुजा पसारी ॥
गहे न जाहिँ करन्हि पर फिरहीं । जन जुग मधुप कमल बन चरहीं ॥

rudhira dekhi biṣāda ura bhārī | tinhahiṃ dharana kahām̐ bhujā pasārī ||
gahe na jāhim̐ karanhi para phirahīṃ | jana juga madhupa kamala bana carahīṃ ||

कोपि कूदि होउ धरेसि बहोरी । महि पटकत भजे भुजा मरोरी ॥
पुनि सकोप दस धनु कर लीन्हे । सरन्हि मारि घायल कपि कीन्हे ॥

kopi kūdi hou dharesi bahorī | mahi paṭakata bhaje bhujā marorī ||
puni sakopa dasa dhanu kara līnhe | saranhi māri ghāyala kapi kīnhe ||

हनुमदादि मुरुछित करि बन्दर । पाइ प्रदोष हरष दसकन्धर ॥
मुरछित देखि सकल कपि बीरा । जामवन्त धायउ रनधीरा ॥

hanumadādi muruchita kari bandara | pāi pradoṣa haraṣa dasakandhara ||
murachita dekhi sakala kapi bīrā | jāmavanta dhāyau ranadhīrā ||

सङ्ग भालु भूधर तरु धारी । मारन लगे पचारी पचारी ॥
भयउ क्रुद्ध रावन बलवाना । गहि पर महि पटकइ भट नाना ॥

saṅga bhālu bhūdhara taru dhārī | mārana lage pacārī pacārī ||
bhayau kruddha rāvana balavānā | gahi para mahi paṭakai bhaṭa nānā ||

देखि भालुपति निज दल घाता । कोपि माझ उर मारेसि लाता ॥

dekhi bhālupati nija dala ghātā | kopi mājha ura māresi lātā ||