अध्याय 76: लक्ष्मण के हाथों मेघनाद का वध

जाइ कपिन्ह सो देखा बैसा । आहुति देत रुधिर अस भैंसा ॥
कीन्ह कपिन्ह सब जग्य विधंसा । जब न उठइ तब करहिं प्रसंसा ॥

jāi kapinha so dekhā baisā | āhuti deta rudhira asa bhaiṃsā ||
kīnha kapinha saba jagya vidhaṃsā | jaba na uṭhai taba karahiṃ prasaṃsā ||

तदपि न उठइ धरेन्हि कच जाई । लातन्हि हति हति चले पराई ॥
लेइ त्रिशूल धावा कपि भागे । आये जहँ रामानुज आगे ॥

tadapi na uṭhai dharenhi kaca jāī | lātanhi hati hati cale parāī ||
lei triśūla dhāvā kapi bhāge | āye jaham̐ rāmānuja āge ||

आवा परम क्रोध कर मारा । गर्ज घोर रव बारहिँ बारा ॥
कोपि मरुत-सुत अङ्गद धाये । हति त्रिसूल उर धरनि गिराये ॥

āvā parama krodha kara mārā | garja ghora rava bārahim̐ bārā ||
kopi maruta-suta aṅgada dhāye | hati trisūla ura dharani girāye ||

प्रभु कहँ छाँड़ेसि सूल प्रचंडा । सर हति कृत अनन्त जुग खंडा ॥
उठि बहोरि मारुति जुबराजा । हतहिँ कोपि तेहि घाउ न बाजा ॥

prabhu kaham̐ chām̐r̤esi sūla pracaṃḍā | sara hati kṛta ananta juga khaṃḍā ||
uṭhi bahori māruti jubarājā | hatahim̐ kopi tehi ghāu na bājā ||

फिरे बीर रिपु मरइ न मारा । तब धावा करि घोर चिकारा ॥
आवत देखि क्रुद्ध जनु काला । लछिमन छाड़े बिसिख कराला ॥

phire bīra ripu marai na mārā | taba dhāvā kari ghora cikārā ||
āvata dekhi kruddha janu kālā | lachimana chār̤e bisikha karālā ||

देखेसि आवत पबि सम बाना । तुरत भयउ खल अन्तरधाना ॥
बिबिध बेष धरि करइ लराई । कबहुँक प्रगट कबहुँ दुरि जाई ॥

dekhesi āvata pabi sama bānā | turata bhayau khala antaradhānā ||
bibidha beṣa dhari karai larāī | kabahum̐ka pragaṭa kabahum̐ duri jāī ||

देखि अजय रिपु डरपे कीसा । परम क्रुद्ध तब भयउ अहीसा ॥
लछिमन मन अस मन्त्र दृढ़ावा । एहि पापिहि मैं बहुत खेलावा ॥

dekhi ajaya ripu ḍarape kīsā | parama kruddha taba bhayau ahīsā ||
lachimana mana asa mantra dṛr̤hāvā | ehi pāpihi maiṃ bahuta khelāvā ||

सुमिरि कोसलाधीस प्रतापा । सर सन्धान कीन्ह करि दापा ॥
छाड़ा बान माँझ उर लागा । मरती बार कपट सब त्यागा ॥

sumiri kosalādhīsa pratāpā | sara sandhāna kīnha kari dāpā ||
chār̤ā bāna mām̐jha ura lāgā | maratī bāra kapaṭa saba tyāgā ||