अध्याय 5: सेना पार उतरी, रावण ने सेतु की बात सुनी

अस कौतुक बिलोकि दोउ भाई । बिहँसि चले कृपाल रघुराई ॥
सेन सहित उतरे रघुबीरा । कहि न जाइ कपि-जूथप-भीरा ॥

asa kautuka biloki dou bhāī | biham̐si cale kṛpāla raghurāī ||
sena sahita utare raghubīrā | kahi na jāi kapi-jūthapa-bhīrā ||

सिन्धु पार प्रभु डेरा कीन्हा । सकल कपिन्ह कहँ आयसु दीन्हा ॥
खाहु जाइ फल मूल सुहाये । सुनत भालु कपि जहँ तहँ धाये ॥

sindhu pāra prabhu ḍerā kīnhā | sakala kapinha kaham̐ āyasu dīnhā ||
khāhu jāi phala mūla suhāye | sunata bhālu kapi jaham̐ taham̐ dhāye ||

सब तरु फरे राम-हित-लागी । रितु अरु कुरितु काल गति त्यागी ॥
खाहिँ मधुर-पाल बटप हलावहिँ । लङ्का सनमुख सिखर चलावहिं ॥

saba taru phare rāma-hita-lāgī | ritu aru kuritu kāla gati tyāgī ||
khāhim̐ madhura-pāla baṭapa halāvahim̐ | laṅkā sanamukha sikhara calāvahiṃ ||

जहँ कहुँ फिरत निसाचर पावहिं । घेरि सकल बहु नाच नचावहिं ॥
दसनन्हि काटि नासिका काना । कहि प्रभु सुजसु देहिँ तब जाना ॥

jaham̐ kahum̐ phirata nisācara pāvahiṃ | gheri sakala bahu nāca nacāvahiṃ ||
dasananhi kāṭi nāsikā kānā | kahi prabhu sujasu dehim̐ taba jānā ||

जिन्ह कर नासा कान निपाता । तिन्ह रावनहि कही सब बाता ॥
सुनत स्रवन बारिधि-बन्धाना । दस मुख बोलि उठा अकुलाना ॥

jinha kara nāsā kāna nipātā | tinha rāvanahi kahī saba bātā ||
sunata sravana bāridhi-bandhānā | dasa mukha boli uṭhā akulānā ||