अध्याय 42: रावण भागती सेना को लौटाता है

राम-प्रताप-प्रबल कपि-जूथा । मर्दहिँ निसिचर-निकर-बरूथा ॥
चढ़े दुर्ग पुनि जहँ तहँ बानर । जय रघुबीर प्रताप-दिवाकर ॥

rāma-pratāpa-prabala kapi-jūthā | mardahim̐ nisicara-nikara-barūthā ||
car̤he durga puni jaham̐ taham̐ bānara | jaya raghubīra pratāpa-divākara ||

चले निसाचर-निकर पराई । प्रबल पवन जिमि घन समुदाई ॥
हाहाकार भयउ पुर भारी । रोवहिँ बालक आतुर नारी ॥

cale nisācara-nikara parāī | prabala pavana jimi ghana samudāī ||
hāhākāra bhayau pura bhārī | rovahim̐ bālaka ātura nārī ||

सब मिलि देहिँ रावनहि मारी । राज करत एहिं मृत्यु हँकारी ॥
निज दल बिचल सुनी तेहिं काना । फेरि सुभट लंकेस रिसाना ॥

saba mili dehim̐ rāvanahi mārī | rāja karata ehiṃ mṛtyu ham̐kārī ||
nija dala bicala sunī tehiṃ kānā | pheri subhaṭa laṃkesa risānā ||

जो रन-बिमुख फिरा मैं जाना । सो मैं हतब कराल कृपाना ॥
सरबस खाइ भोग करि नाना । समर-भूमि भये बल्लभ प्राना ॥

jo rana-bimukha phirā maiṃ jānā | so maiṃ hataba karāla kṛpānā ||
sarabasa khāi bhoga kari nānā | samara-bhūmi bhaye ballabha prānā ||

उग्र बचन सुनि सकल डेराने । फिरे क्रोध करि बीर लजाने ॥
सनमुख मरन धीर के सोभा । तब तिन्ह तजा प्रान कर लोभा ॥

ugra bacana suni sakala ḍerāne | phire krodha kari bīra lajāne ||
sanamukha marana dhīra ke sobhā | taba tinha tajā prāna kara lobhā ||