अध्याय 40: रावण राक्षसों को परकोटे पर भेजता है

लंकाँ भयउ कोलाहल भारी । सुना दसानन अति अहँकारी ॥
देखहु बनरन्ह केरि ढिठाई । बिहँसि निसाचर सेन बोलाई ॥

laṃkām̐ bhayau kolāhala bhārī | sunā dasānana ati aham̐kārī ||
dekhahu banaranha keri ḍhiṭhāī | biham̐si nisācara sena bolāī ||

आये कीस काल के प्रेरे । छुधावन्त सब निसिचर मेरे ॥
अस कहि अट्टहास सठ कीन्हा । गृह बैठे अहार बिधि दीन्हा ॥

āye kīsa kāla ke prere | chudhāvanta saba nisicara mere ||
asa kahi aṭṭahāsa saṭha kīnhā | gṛha baiṭhe ahāra bidhi dīnhā ||

सुभट सकल चारिहुँ दिसि जाहू । धरि धरि भालु कीस सब खाहू ॥
उमा रावनहि अस अभिमाना । जिमि टिट्टिभ-खग सूत उताना ॥

subhaṭa sakala cārihum̐ disi jāhū | dhari dhari bhālu kīsa saba khāhū ||
umā rāvanahi asa abhimānā | jimi ṭiṭṭibha-khaga sūta utānā ||

चले निसाचर आयसु मागी । गहि कर भिंडिपाल बर साँगी ॥
तोमर मुग्दर परसु प्रचंडा । सूल कृपान परिघ गिरिखंडा ॥

cale nisācara āyasu māgī | gahi kara bhiṃḍipāla bara sām̐gī ||
tomara mugdara parasu pracaṃḍā | sūla kṛpāna parigha girikhaṃḍā ||

जिमि अरुनोपल निकर निहारी । धावहिँ सठ खग मांस-अहारी ॥
चोंच-अङ्ग-दुख तिन्हहिं न सूझा । तिमि धाये मनुजाद अबूझा ॥

jimi arunopala nikara nihārī | dhāvahim̐ saṭha khaga māṃsa-ahārī ||
coṃca-aṅga-dukha tinhahiṃ na sūjhā | timi dhāye manujāda abūjhā ||