अध्याय 39: चार दल लंका को घेरने चले

रिपु के समाचार जब पाये । राम सचिव सब निकट बोलाये ॥
लङ्का बाँके चारि दुआरा । केहि विधि लागिअ करहु बिचारा ॥

ripu ke samācāra jaba pāye | rāma saciva saba nikaṭa bolāye ||
laṅkā bām̐ke cāri duārā | kehi vidhi lāgia karahu bicārā ||

तब कपीस रिच्छेस बिभीषन । सुमिरि-हृदयँ दिनकर-कुल-भूषन ॥
करि विचार तिन्ह मन्त्र दृढ़ावा । चारि अनी कपि-कटक बनावा ॥

taba kapīsa ricchesa bibhīṣana | sumiri-hṛdayam̐ dinakara-kula-bhūṣana ||
kari vicāra tinha mantra dṛr̤hāvā | cāri anī kapi-kaṭaka banāvā ||

जथाजोग सेनापति कीन्हे । जूथप सकल बोलि तम लीन्हे ॥
प्रभु प्रताप कहि सब समुझाये । सुनि कपि सिंघनाद करि धाये ॥

jathājoga senāpati kīnhe | jūthapa sakala boli tama līnhe ||
prabhu pratāpa kahi saba samujhāye | suni kapi siṃghanāda kari dhāye ||

हरषित राम-चरन सिर नावहिं । गहि-गिरि-सिखर बीर सब धावहिं ॥
गर्जहिँ तर्जहिँ भालु कपीसा । जय रघुबीर कोसलाधीसा ॥

haraṣita rāma-carana sira nāvahiṃ | gahi-giri-sikhara bīra saba dhāvahiṃ ||
garjahim̐ tarjahim̐ bhālu kapīsā | jaya raghubīra kosalādhīsā ||

जानत परम दुर्ग अति लङ्का । प्रभु प्रताप कपि चले असङ्का ॥
घटाटोप करि चहुँ दिसि घेरी । मुखहिं निसान बजावहिँ भेरी ॥

jānata parama durga ati laṅkā | prabhu pratāpa kapi cale asaṅkā ||
ghaṭāṭopa kari cahum̐ disi gherī | mukhahiṃ nisāna bajāvahim̐ bherī ||