अध्याय 34: अंगद का पैर, जिसे कोई न हिला सका

मैं तव दसन तोरिबे लायक । आयसु मोहि न दीन्ह रघुनायक ॥
अस रिस होत दसउ मुख तोरौं । लङ्का गहि समुद्र महँ बोरौं ॥

maiṃ tava dasana toribe lāyaka | āyasu mohi na dīnha raghunāyaka ||
asa risa hota dasau mukha torauṃ | laṅkā gahi samudra maham̐ borauṃ ||

गूलरि-फल-समान तन लङ्का । बसहु मध्य तुम्ह जन्तु असङ्का ॥
मैं बानर फल खात न बारा । आयसु दीन्ह न राम उदारा ॥

gūlari-phala-samāna tana laṅkā | basahu madhya tumha jantu asaṅkā ||
maiṃ bānara phala khāta na bārā | āyasu dīnha na rāma udārā ||

जुगुति सुनत रावन मुसुकाई । मूढ़ लिखे कहँ बहुत झुठाई ॥
बालि न कबहुँ गाल अस मारा । मिलि तपसिन्ह तैं भएसि लवारा ॥

juguti sunata rāvana musukāī | mūr̤ha likhe kaham̐ bahuta jhuṭhāī ||
bāli na kabahum̐ gāla asa mārā | mili tapasinha taiṃ bhaesi lavārā ||

साँचेहु मैं लबार भुज बीहा । जौँ न उपारिउँ तव दस-जीहा ॥
समुझि राम प्रताप कपि कोपा । सभा माझ पन करि पद रोपा ॥

sām̐cehu maiṃ labāra bhuja bīhā | jaum̐ na upārium̐ tava dasa-jīhā ||
samujhi rāma pratāpa kapi kopā | sabhā mājha pana kari pada ropā ||

जौँ मल चरन सकसि सठ टारी । फिरहिं राम सीता मैं हारी ॥
सुनहु सुभट सब कह दससीसा । पद गहि धरनि पछारहु कीसा ॥

jaum̐ mala carana sakasi saṭha ṭārī | phirahiṃ rāma sītā maiṃ hārī ||
sunahu subhaṭa saba kaha dasasīsā | pada gahi dharani pachārahu kīsā ||

इन्द्रजीत आदिक बलवाना । हरषि उठे जहँ तहँ भट नाना ॥
झपटहिँ करि बल बिपुल उपाई । पद न टरइ बैठहिँ सिर नाई ॥

indrajīta ādika balavānā | haraṣi uṭhe jaham̐ taham̐ bhaṭa nānā ||
jhapaṭahim̐ kari bala bipula upāī | pada na ṭarai baiṭhahim̐ sira nāī ||

पुनि उठि झपटहिँ सुर आराती । टरइ न कीस चरन एहि भाँती ॥
पुरुष-कुजोगी जिमि उरगारी । मोह-बिटप नहिँ सकहिं उपारी ॥

puni uṭhi jhapaṭahim̐ sura ārātī | ṭarai na kīsa carana ehi bhām̐tī ||
puruṣa-kujogī jimi uragārī | moha-biṭapa nahim̐ sakahiṃ upārī ||