अध्याय 111: ब्रह्मा द्वारा श्रीराम की स्तुति

अब राम सदा सुखधाम हरे । रघुनायक सायक-चाप धरे ।
भव बारन दारन सिंह प्रभो । गुन सागर नागर नाथ बिभो ॥
तनु काम अनेक अनूप छबी । गुन गावत सिद्ध मुनींद्र कबी ।
जस पावन रावन नाग महा । खगनाथ जथा करि कोप गहा ॥

aba rāma sadā sukhadhāma hare | raghunāyaka sāyaka-cāpa dhare |
bhava bārana dārana siṃha prabho | guna sāgara nāgara nātha bibho ||
tanu kāma aneka anūpa chabī | guna gāvata siddha munīṃdra kabī |
jasa pāvana rāvana nāga mahā | khaganātha jathā kari kopa gahā ||

जन-रंजन भंजन सोक-भयं । गत-क्रोध सदा प्रभु बोध-मयं ।
अवतार उदार अपार गुनं । महि-भार-बिभञ्जन ग्यानघनं ॥
अज ब्यापकमेकमनादि सदा । करुनाकर राम नमामि मुदा ।
रघुबंस-विभूषन दूषन हा । कृत भूप बिभीषन दीन रहा ॥

jana-raṃjana bhaṃjana soka-bhayaṃ | gata-krodha sadā prabhu bodha-mayaṃ |
avatāra udāra apāra gunaṃ | mahi-bhāra-bibhañjana gyānaghanaṃ ||
aja byāpakamekamanādi sadā | karunākara rāma namāmi mudā |
raghubaṃsa-vibhūṣana dūṣana hā | kṛta bhūpa bibhīṣana dīna rahā ||

गुन-ज्ञान निधान अमान अजं । नित राम नमामि बिभुं बिरजं ।
भुजदंड प्रचंड प्रताप बलं । खल बृन्द-निकन्द महा कुसलं ॥
बिनु कारन दीन दयाल हितं । छबि-धाम नमामि रमा-सहितं ।
भव तारन-कारन काज-परं । मन-सम्भव दारुन-दोष-हरं ॥

guna-jñāna nidhāna amāna ajaṃ | nita rāma namāmi bibhuṃ birajaṃ |
bhujadaṃḍa pracaṃḍa pratāpa balaṃ | khala bṛnda-nikanda mahā kusalaṃ ||
binu kārana dīna dayāla hitaṃ | chabi-dhāma namāmi ramā-sahitaṃ |
bhava tārana-kārana kāja-paraṃ | mana-sambhava dāruna-doṣa-haraṃ ||

सर चाप मनोहर त्रोन धरं । जरजारुन-लोचन भूपबरं ।
सुख-मन्दिर सुन्दर श्रीरमनं । मद मार मुधा-ममता-समनं ॥
अनवद्य अखंड न गोचर गो । सब रूप सदा सब होइ न गो ।
इति बेद बदन्ति न दन्तकथा । रवि आतप भिन्नमभिन्न जथा ॥

sara cāpa manohara trona dharaṃ | jarajāruna-locana bhūpabaraṃ |
sukha-mandira sundara śrīramanaṃ | mada māra mudhā-mamatā-samanaṃ ||
anavadya akhaṃḍa na gocara go | saba rūpa sadā saba hoi na go |
iti beda badanti na dantakathā | ravi ātapa bhinnamabhinna jathā ||

कृतकृत्य बिभो सब बानर ये । निरखंति तवानन सादर जे ।
धिग जीवन देव सरीर हरे । तव भक्ति बिना भव भूलि परे ॥
अब दीन दयाल दया करिऐ । मति मोरि बिभेदकरी हरिऐ ।
जेहि तैं बिपरीत क्रिया करिऐ । दुख से सुख मानि सुखी चरिऐ ॥

kṛtakṛtya bibho saba bānara ye | nirakhaṃti tavānana sādara je |
dhiga jīvana deva sarīra hare | tava bhakti binā bhava bhūli pare ||
aba dīna dayāla dayā kariai | mati mori bibhedakarī hariai |
jehi taiṃ biparīta kriyā kariai | dukha se sukha māni sukhī cariai ||

खल खंडन मंडन-रम्य छमा । पद-पङ्कज सेवित सम्भु उमा ।
नृप-नायक दे बरदानमिदं । चरनाम्बुज प्रेम सदा सुभदं ॥

khala khaṃḍana maṃḍana-ramya chamā | pada-paṅkaja sevita sambhu umā |
nṛpa-nāyaka de baradānamidaṃ | caranāmbuja prema sadā subhadaṃ ||