अध्याय 28: सम्पाति की कथा और लंका का पता

अनुज क्रिया करि सागर तीरा । कह निज कथा सुनहु कपि बीरा ॥
हम दोउ बन्धु प्रथम तरुनाई । गगन गये रबि निकट उड़ाई ॥

anuja kriyā kari sāgara tīrā | kaha nija kathā sunahu kapi bīrā ||
hama dou bandhu prathama tarunāī | gagana gaye rabi nikaṭa ur̤āī ||

तेज न सहि सक सो फिरि आवा । मैं अभिमानी रबि निअरावा ॥
जरे पंख अति तेज अपारा । परेउँ भूमि करि घोर चिकारा ॥

teja na sahi saka so phiri āvā | maiṃ abhimānī rabi niarāvā ||
jare paṃkha ati teja apārā | pareum̐ bhūmi kari ghora cikārā ||

मुनि एक नाम चन्द्रमा ओही । लागी दया देखि करि मोही ॥
बहु प्रकार तेहि ज्ञान सुनावा । देह-जनित-अभिमानी छड़ावा ॥

muni eka nāma candramā ohī | lāgī dayā dekhi kari mohī ||
bahu prakāra tehi jñāna sunāvā | deha-janita-abhimānī char̤āvā ||

त्रेताँ ब्रह्म मनुज तनु धरिहीं । तासु नारि निसिचर-पति हरिहीं ॥
तासु खोज पठइहि प्रभू दूता । तिन्हहिँ मिलें तैं होब पुनीता ॥

tretām̐ brahma manuja tanu dharihīṃ | tāsu nāri nisicara-pati harihīṃ ||
tāsu khoja paṭhaihi prabhū dūtā | tinhahim̐ mileṃ taiṃ hoba punītā ||

जमिहहिं पंख करसि जनि चिन्ता । तिन्हहिँ देखाइ देहेसु तैं सीता ॥
मुनि कइ गिरा सत्य भइ आजू । सुनि मम बचन करहु प्रभु काजू ॥

jamihahiṃ paṃkha karasi jani cintā | tinhahim̐ dekhāi dehesu taiṃ sītā ||
muni kai girā satya bhai ājū | suni mama bacana karahu prabhu kājū ||

गिरि-त्रिकूट ऊपर बस लङ्का । तहँ रह रावन सहज असङ्का ॥
तहँ असोक-उपबन जहँ रहई । सीता बैठि सोच-रत अहई ॥

giri-trikūṭa ūpara basa laṅkā | taham̐ raha rāvana sahaja asaṅkā ||
taham̐ asoka-upabana jaham̐ rahaī | sītā baiṭhi soca-rata ahaī ||