अध्याय 27: सम्पाति का जटायु का समाचार सुनना

एहि बिधि कथा कहहिँ बहु भाँती गिरि कंदराँ सुनी सम्पाती ॥
बाहेर होइ देखि बहु कीसा । मोहि अहार दीन्ह जगदीसा ॥

ehi bidhi kathā kahahim̐ bahu bhām̐tī giri kaṃdarām̐ sunī sampātī ||
bāhera hoi dekhi bahu kīsā | mohi ahāra dīnha jagadīsā ||

आजु सबहि कहँ भच्छन करऊँ । दिन बहु चले अहार बिनु मरऊँ ॥
कबहुँ न मिल भरि उदर अहारा । आजु दीन्ह बिधि एकहिं बारा ॥

āju sabahi kaham̐ bhacchana karaūm̐ | dina bahu cale ahāra binu maraūm̐ ||
kabahum̐ na mila bhari udara ahārā | āju dīnha bidhi ekahiṃ bārā ||

डरपे गीध बचन सुनि काना । अब भा मरन सत्य हम जाना ॥
कपि सब उठे गीध कहँ देखी । जामवन्त मन सोच बिसेखी ॥

ḍarape gīdha bacana suni kānā | aba bhā marana satya hama jānā ||
kapi saba uṭhe gīdha kaham̐ dekhī | jāmavanta mana soca bisekhī ||

कह अङ्गद बिचारि मन माहीं । धन्य जटायू सम कोउ नाहीं ॥
राम-काज-कारन तनु त्यागी । हरि पुर गयउ परम-बड़ भागी ॥

kaha aṅgada bicāri mana māhīṃ | dhanya jaṭāyū sama kou nāhīṃ ||
rāma-kāja-kārana tanu tyāgī | hari pura gayau parama-bar̤a bhāgī ||

सुनि खग हरष सोक जुत बानी । आवा निकट कपिन्ह भय मानी ॥
तिन्हहिँ अभय करि पूछेसि जाई । कथा सकल तिन्ह ताहि सुनाई ॥

suni khaga haraṣa soka juta bānī | āvā nikaṭa kapinha bhaya mānī ||
tinhahim̐ abhaya kari pūchesi jāī | kathā sakala tinha tāhi sunāī ||

सुनि सम्पाति बन्धु कै करनी । रघुपति महिमा बहु बिधि बरनी ॥

suni sampāti bandhu kai karanī | raghupati mahimā bahu bidhi baranī ||