अध्याय 65: यज्ञ विध्वंस और हिमाचल के घर उमा

समाचार सब सङ्कर पाये । बीरभद्र करि कोप पठाये ॥
जग्य बिधंस जाइ तिन्ह कीन्हा । सकल सुरन्ह बिधिवत फल दीन्हा ॥

samācāra saba saṅkara pāye | bīrabhadra kari kopa paṭhāye ||
jagya bidhaṃsa jāi tinha kīnhā | sakala suranha bidhivata phala dīnhā ||

भइ जग बिदित दच्छ-गति सोई । जसि कछु सम्भु-बिमुख कै होई ॥
यह इतिहास सकल जग जाना । ताते मैं संछेप बखाना ॥

bhai jaga bidita daccha-gati soī | jasi kachu sambhu-bimukha kai hoī ||
yaha itihāsa sakala jaga jānā | tāte maiṃ saṃchepa bakhānā ||

सतीं मरत हरि सन बर माँगा । जनम जनम सिव-पद अनुरागा ॥
तेहि कारन हिमगिरि-गृह जाई । जनमीं पारबती तनु पाई ॥

satīṃ marata hari sana bara mām̐gā | janama janama siva-pada anurāgā ||
tehi kārana himagiri-gṛha jāī | janamīṃ pārabatī tanu pāī ||

जब तेँ उमा सैल-गृह-जाईं । सकल सिद्धि सम्पति तहँ छाई ॥
जहँ तहँ मुनिन्ह सुआश्रम कीन्हे । उचित बास हिम भूधर दीन्हें ॥

jaba tem̐ umā saila-gṛha-jāīṃ | sakala siddhi sampati taham̐ chāī ||
jaham̐ taham̐ muninha suāśrama kīnhe | ucita bāsa hima bhūdhara dīnheṃ ||