अध्याय 55: दर्शन समाप्त और शिव का प्रश्न

देखे जहँ तहँ रघुपति जेते । सक्तिन्ह सहित सकल सुर तेते ॥
जीव चराचर जे संसारा । देखे सकल अनेक प्रकारा ॥

dekhe jaham̐ taham̐ raghupati jete | saktinha sahita sakala sura tete ||
jīva carācara je saṃsārā | dekhe sakala aneka prakārā ||

पूजहिं प्रभुहि देव बहु बेखा । राम-रूप दूसर नहिँ देखा ॥
अवलोके रघुपति बहुतेरे । सीता सहित न बेष घनेरे ॥

pūjahiṃ prabhuhi deva bahu bekhā | rāma-rūpa dūsara nahim̐ dekhā ||
avaloke raghupati bahutere | sītā sahita na beṣa ghanere ||

सोइ रघुबर सोइ लछिमन सीता । देखि सती अति भई सभीता ॥
हृदय कम्प तन सुधि कछु नाहीं । नयन मूँदि बैठीं मग माहीँ ॥

soi raghubara soi lachimana sītā | dekhi satī ati bhaī sabhītā ||
hṛdaya kampa tana sudhi kachu nāhīṃ | nayana mūm̐di baiṭhīṃ maga māhīm̐ ||

बहुरि बिलोकेउ नयन उघारी । कछु न दीख तहँ दच्छकुमारी ॥
पुनि पुनि नाइ राम-पद सीसा । चलीँ तहाँ जहँ रहे गिरीसा ॥

bahuri bilokeu nayana ughārī | kachu na dīkha taham̐ dacchakumārī ||
puni puni nāi rāma-pada sīsā | calīm̐ tahām̐ jaham̐ rahe girīsā ||