अध्याय 32: रामचरित के गुणों का बखान

राम चरित चिन्तामनि चारू । सन्त सुमति तिय सुभग सिंगारू ॥
जग मङ्गल गुन ग्राम राम के । दानि मुकुति धन धरम धाम के ॥

rāma carita cintāmani cārū | santa sumati tiya subhaga siṃgārū ||
jaga maṅgala guna grāma rāma ke | dāni mukuti dhana dharama dhāma ke ||

सदगुरु ज्ञान बिराग-जोग के । बिबुध बैद भव भीम रोग के ॥
जननि जनक सिय राम प्रेम के । बीज सकल ब्रत धरम नेम के ॥

sadaguru jñāna birāga-joga ke | bibudha baida bhava bhīma roga ke ||
janani janaka siya rāma prema ke | bīja sakala brata dharama nema ke ||

समन पाप सन्ताप सोक के । प्रिय पालक परलोक लोक के ॥
सचिव सुभट भूपति बिचार के । कुम्भज लोभ उदधि अपार के ॥

samana pāpa santāpa soka ke | priya pālaka paraloka loka ke ||
saciva subhaṭa bhūpati bicāra ke | kumbhaja lobha udadhi apāra ke ||

काम-कोह कलिमल करि गन के । केहरि सावक जन मन बन के ॥
अतिथि पूज्य प्रियतम पुरारि के । कामद घन दारिद दवारि के ॥

kāma-koha kalimala kari gana ke | kehari sāvaka jana mana bana ke ||
atithi pūjya priyatama purāri ke | kāmada ghana dārida davāri ke ||

मन्त्र महा मनि बिषय ब्याल के । मेटत कठिन कुअङ्क भाल के ॥
हरन मोह तम दिनकर कर से । सेवक सालि पाल जलधर से ॥

mantra mahā mani biṣaya byāla ke | meṭata kaṭhina kuaṅka bhāla ke ||
harana moha tama dinakara kara se | sevaka sāli pāla jaladhara se ||

अभिमत दानि देवतरु बर से । सेवत सुलभ सुखद हरि हर से ॥
सुकबि सरद नभ मन उडुगन से । राम भगत जन जीवन धन से ॥

abhimata dāni devataru bara se | sevata sulabha sukhada hari hara se ||
sukabi sarada nabha mana uḍugana se | rāma bhagata jana jīvana dhana se ||

सकल सुकृत फल भूरि भोग से । जग हित निरुपधि साधु लोग से ॥
सेवक मन मानस मराल से । पावन गङ्ग तरङ्ग माल से ॥

sakala sukṛta phala bhūri bhoga se | jaga hita nirupadhi sādhu loga se ||
sevaka mana mānasa marāla se | pāvana gaṅga taraṅga māla se ||