अध्याय 31: रामकथा कैसी है

तदपि कही गुर बारहिँ बारा । समुझि परी कछु मति अनुसारा ॥
भाषाबद्ध करब मैं सोई । मोरें मन प्रबोध जेहिं होई ॥

tadapi kahī gura bārahim̐ bārā | samujhi parī kachu mati anusārā ||
bhāṣābaddha karaba maiṃ soī | moreṃ mana prabodha jehiṃ hoī ||

जस कछु बुधि-बिबेक-बल मेरें । तस कहिहउँ हियँ हरि के प्रेरें ॥
निज सन्देह-मोह-भ्रम-हरनी । करउँ कथा भव-सरिता-तरनी ॥

jasa kachu budhi-bibeka-bala mereṃ | tasa kahihaum̐ hiyam̐ hari ke prereṃ ||
nija sandeha-moha-bhrama-haranī | karaum̐ kathā bhava-saritā-taranī ||

बुध-बिस्राम सकल-जन-रञ्जनि । राम-कथा कलि-कलुष-बिभञ्जनि ॥
रामकथा-कलि-पंनग-भरनी । पुनि बिबेक-पावक कहँ अरनी ॥

budha-bisrāma sakala-jana-rañjani | rāma-kathā kali-kaluṣa-bibhañjani ||
rāmakathā-kali-paṃnaga-bharanī | puni bibeka-pāvaka kaham̐ aranī ||

रामकथा कलि कामद गाई । सुजन सजीवनि मूरि सुहाई ॥
सोइ बसुधातल सुधा तरङ्गिनि । भय भञ्जनि भ्रम भेक भुअङ्गिनि ॥

rāmakathā kali kāmada gāī | sujana sajīvani mūri suhāī ||
soi basudhātala sudhā taraṅgini | bhaya bhañjani bhrama bheka bhuaṅgini ||

असुर सेन सम नरक निकन्दिनि । साधु बिबुध कुल हित गिरिनन्दिनि ॥
सन्त समाज पयोधि रमा सी । बिस्व भार भर अचल छमा सी ॥

asura sena sama naraka nikandini | sādhu bibudha kula hita girinandini ||
santa samāja payodhi ramā sī | bisva bhāra bhara acala chamā sī ||

जम गन मुहँ मसि जग जमुना सी । जीवन मुकुति हेतु जनु कासी ॥
रामहि प्रिय पावनि तुलसी सी । तुलसिदास हित हियँ हुलसी सी ॥

jama gana muham̐ masi jaga jamunā sī | jīvana mukuti hetu janu kāsī ||
rāmahi priya pāvani tulasī sī | tulasidāsa hita hiyam̐ hulasī sī ||

सिव प्रिय मेकल सैल सुता सी । सकल सिद्धि सुख सम्पति रासी ॥
सदगुन सुरगन अम्ब अदिति सी । रघुवर भगति प्रेम परमिति सी ॥

siva priya mekala saila sutā sī | sakala siddhi sukha sampati rāsī ||
sadaguna suragana amba aditi sī | raghuvara bhagati prema paramiti sī ||