अध्याय 3: सत्संग की महिमा और सन्तों की वन्दना

मज्जन फल पेखिअ ततकाला । काक होहिं पिक बकउ मराला ॥
सुनि आचरज करइ जनि कोई । सत-सङ्गति-महिमा नहिँ गोई ॥

majjana phala pekhia tatakālā | kāka hohiṃ pika bakau marālā ||
suni ācaraja karai jani koī | sata-saṅgati-mahimā nahim̐ goī ||

बालमीक नारद घटजोनी । निज निज मुखनि कही निज होनी ॥
जलचर थलचर नभचर नाना । जे जड़-चेतन जीव जहाना ॥

bālamīka nārada ghaṭajonī | nija nija mukhani kahī nija honī ||
jalacara thalacara nabhacara nānā | je jar̤a-cetana jīva jahānā ||

मति कीरति गति भूति भलाई । जब जेहिं जतन जहाँ जेहिं पाई ॥
सो जानब सतसङ्ग प्रभाऊ । लोकहु बेद न आन उपाऊ ॥

mati kīrati gati bhūti bhalāī | jaba jehiṃ jatana jahām̐ jehiṃ pāī ||
so jānaba satasaṅga prabhāū | lokahu beda na āna upāū ||

बिनु सतसङ्ग बिबेक न होई । राम-कृपा-बिनु सुलभ न सोई ॥
सतसंगत मुद-मङ्गल मूला । सोइ फल सिधि सब साधन फूला ॥

binu satasaṅga bibeka na hoī | rāma-kṛpā-binu sulabha na soī ||
satasaṃgata muda-maṅgala mūlā | soi phala sidhi saba sādhana phūlā ||

सठ सुधरहिँ सतसङ्गति पाई । पारस परस कुधातु सुहाई ॥
विधि बस सुजन कुसङ्गति परहीं । फनि मनि सम निज गुन अनुसरहीँ ॥

saṭha sudharahim̐ satasaṅgati pāī | pārasa parasa kudhātu suhāī ||
vidhi basa sujana kusaṅgati parahīṃ | phani mani sama nija guna anusarahīm̐ ||

बिधि हरि हर कबि कोबिद बानी । कहत साधु-महिमा सकुचानी ॥
सो मो सन कहि जात न कैसें । साक-बनिक मनि-गुन गन-गुन जैसें ॥

bidhi hari hara kabi kobida bānī | kahata sādhu-mahimā sakucānī ||
so mo sana kahi jāta na kaiseṃ | sāka-banika mani-guna gana-guna jaiseṃ ||