अध्याय 2: ब्राह्मण, सन्त और चलता फिरता प्रयाग

गुरु-पद-रज मृदु मञ्जुल अञ्जन । नयन-अमिय दृग दोष बिभञ्जन ॥
तेहिं करि बिमल बिबेक बिलोचन । बरनउँ राम चरित भव-मोचन ॥

guru-pada-raja mṛdu mañjula añjana | nayana-amiya dṛga doṣa bibhañjana ||
tehiṃ kari bimala bibeka bilocana | baranaum̐ rāma carita bhava-mocana ||

बन्दउँ प्रथम महीसुर चरना । मोह जनित संसय सब हरना ॥
सुजन-समाज सकल-गुन-खानी । करउँ प्रनाम सप्रेम सुबानी ॥

bandaum̐ prathama mahīsura caranā | moha janita saṃsaya saba haranā ||
sujana-samāja sakala-guna-khānī | karaum̐ pranāma saprema subānī ||

साधु चरित सुभ सरिस कपासू । निरस बिसद गुन-मय फल जासू ॥
जो सहि दुख पर-छिद्र दुरावा । वन्दनीय जेहिं जग जस पावा ॥

sādhu carita subha sarisa kapāsū | nirasa bisada guna-maya phala jāsū ||
jo sahi dukha para-chidra durāvā | vandanīya jehiṃ jaga jasa pāvā ||

मुद-मङ्गल-मय सन्त-समाजू । जो जग जङ्गम तीरथराजू ॥
रामभगति जहँ सुरसरि धारा । सरसइ ब्रह्म-विचार-प्रचारा ॥

muda-maṅgala-maya santa-samājū | jo jaga jaṅgama tīratharājū ||
rāmabhagati jaham̐ surasari dhārā | sarasai brahma-vicāra-pracārā ||

विधि-निषेध-मय कलिमल-हरनी । करम कथा रबिनंदनि बरनी ॥
हरि-हर-कथा बिराजति बेनी । सुनत सकल-मुद-मङ्गल देनी ॥

vidhi-niṣedha-maya kalimala-haranī | karama kathā rabinaṃdani baranī ||
hari-hara-kathā birājati benī | sunata sakala-muda-maṅgala denī ||

बट बिस्वास अचल निज-धरमा । तीरथराज-समाज सुकरमा ॥
सबहिँ सुलभ सब दिन सब देसा । सेवत सादर समन कलेसा ॥

baṭa bisvāsa acala nija-dharamā | tīratharāja-samāja sukaramā ||
sabahim̐ sulabha saba dina saba desā | sevata sādara samana kalesā ||

अकथ अलौकिक तीरथराऊ । देइ सद्य फल प्रगट प्रभाऊ ॥

akatha alaukika tīratharāū | dei sadya phala pragaṭa prabhāū ||