अध्याय 28: दीन सेवक और कृपालु स्वामी

भायँ कुभायँ अनख आलसहूँ । नाम जपत मङ्गल दिसि दसहूँ ॥
सुमिरि सो नाम राम गुन गाथा । करउँ नाइ रघुनाथहि माथा ॥

bhāyam̐ kubhāyam̐ anakha ālasahūm̐ | nāma japata maṅgala disi dasahūm̐ ||
sumiri so nāma rāma guna gāthā | karaum̐ nāi raghunāthahi māthā ||

मोरि सुधारिहि सो सब भाँती । जासु कृपा नहिँ कृपाँ अघाती ॥
राम सुस्वामि कुसेवक मो सो । निज दिसि देखि दयानिधि पोसो ॥

mori sudhārihi so saba bhām̐tī | jāsu kṛpā nahim̐ kṛpām̐ aghātī ||
rāma susvāmi kusevaka mo so | nija disi dekhi dayānidhi poso ||

लोकहु बेद सुसाहिब रीतीं । बिनय सुनत पहिचानत प्रीती ॥
गनी गरीब ग्राम नर नागर । पंडित मूढ़ मलीन उजागर ॥

lokahu beda susāhiba rītīṃ | binaya sunata pahicānata prītī ||
ganī garība grāma nara nāgara | paṃḍita mūr̤ha malīna ujāgara ||

सुकबि कुकबि निज-मति-अनुहारी । नृपहि सराहत सब नर नारी ॥
साधु सुजान सुसील नृपाला । ईस-अंस-भव परम कृपाला ॥

sukabi kukabi nija-mati-anuhārī | nṛpahi sarāhata saba nara nārī ||
sādhu sujāna susīla nṛpālā | īsa-aṃsa-bhava parama kṛpālā ||

सुनि सनमानहिँ सबहि सुबानी । भनिति भगति नति गति पहिचानी ॥
यह प्राकृत महिपाल सुभाऊ । जान-सिरोमनि कोसलराऊ ॥

suni sanamānahim̐ sabahi subānī | bhaniti bhagati nati gati pahicānī ||
yaha prākṛta mahipāla subhāū | jāna-siromani kosalarāū ||

रीझत राम सनेह निसोतें । को जग मन्द मलिन-मन मो ते ॥

rījhata rāma saneha nisoteṃ | ko jaga manda malina-mana mo te ||