अध्याय 261: श्रीराम शिव-धनुष तोड़ते हैं

देखी बिपुल बिकल बैदेही । निमिष बिहात कलप सम तेही ॥
तृषित बारि बिनु जो तनु त्यागा । मुये करइ का सुधा तड़ागा ॥

dekhī bipula bikala baidehī | nimiṣa bihāta kalapa sama tehī ||
tṛṣita bāri binu jo tanu tyāgā | muye karai kā sudhā tar̤āgā ||

का बरषा जब कृषी सुखानें । समय चुकें पुनि का पछितानें ॥
अस जियँ जानि जानकी देखी । प्रभु पुलके लखि प्रीति बिसेखी ॥

kā baraṣā jaba kṛṣī sukhāneṃ | samaya cukeṃ puni kā pachitāneṃ ||
asa jiyam̐ jāni jānakī dekhī | prabhu pulake lakhi prīti bisekhī ||

गुरुहि प्रनाम मनहिँ मन कीन्हा । अति लाघवँ उठाइ धनु लीन्हा ॥
दमकेउ दामिनि जिमि जब लयऊ । पुनि नभ धनु मंडल सम भयऊ ॥

guruhi pranāma manahim̐ mana kīnhā | ati lāghavam̐ uṭhāi dhanu līnhā ||
damakeu dāmini jimi jaba layaū | puni nabha dhanu maṃḍala sama bhayaū ||

लेत चढ़ावत खैँचत गाढ़ें । काहु न लखा देख सबु ठाढ़ें ॥
तेहि छन राम मध्य धनु तोरा । भरे भुवन धुनि घोर कठोरा ॥

leta car̤hāvata khaim̐cata gār̤heṃ | kāhu na lakhā dekha sabu ṭhār̤heṃ ||
tehi chana rāma madhya dhanu torā | bhare bhuvana dhuni ghora kaṭhorā ||