अध्याय 205: राजकुमार श्रीराम की दिनचर्या

बन्धु सखा सँग लेहिँ बोलाई । बन मृगया नित खेलहिँ जाई ॥
पावन-मृग मारहिँ जियँ जानी । दिन प्रति नृपहि देखावहिँ आनी ॥

bandhu sakhā sam̐ga lehim̐ bolāī | bana mṛgayā nita khelahim̐ jāī ||
pāvana-mṛga mārahim̐ jiyam̐ jānī | dina prati nṛpahi dekhāvahim̐ ānī ||

जे मृग राम बान के मारे । ते तनु तजि सुरलोक सिधारे ॥
अनुज सखा सँग भोजन करहीँ । मातु पिता अज्ञा अनुसरहीँ ॥

je mṛga rāma bāna ke māre | te tanu taji suraloka sidhāre ||
anuja sakhā sam̐ga bhojana karahīm̐ | mātu pitā ajñā anusarahīm̐ ||

जेहि बिधि सुखी होहिँ पुर लोगा । करहिँ कृपानिधि सोइ सञ्जोगा ॥
बेद पुरान सुनहिँ मन लाई । आपु कहहिँ अनुजन्ह समुझाई ॥

jehi bidhi sukhī hohim̐ pura logā | karahim̐ kṛpānidhi soi sañjogā ||
beda purāna sunahim̐ mana lāī | āpu kahahim̐ anujanha samujhāī ||

प्रातकाल उठि कै रघुनाथा । मातु पिता गुरु नावहिँ माथा ॥
आयसु माँगि करहिँ पुर-काजा । देखि चरित हरषइ मन राजा ॥

prātakāla uṭhi kai raghunāthā | mātu pitā guru nāvahim̐ māthā ||
āyasu mām̐gi karahim̐ pura-kājā | dekhi carita haraṣai mana rājā ||