अध्याय 186: ब्रह्मा द्वारा प्रभु की स्तुति

जय जय सुर-नायक, जन सुख-दायक, प्रनतपाल भगवन्ता ।
गो-द्विज-हितकारी, जय असुरारी, सिन्धु-सुता प्रिय कन्ता ॥
पालन सुर धरनी, अदभुत-करनी, मरम न जानइ कोई ।
जो सहज कृपाला, दीनदयाला, करहु अनुग्रह सोई ॥

jaya jaya sura-nāyaka, jana sukha-dāyaka, pranatapāla bhagavantā |
go-dvija-hitakārī, jaya asurārī, sindhu-sutā priya kantā ||
pālana sura dharanī, adabhuta-karanī, marama na jānai koī |
jo sahaja kṛpālā, dīnadayālā, karahu anugraha soī ||

जय जय अबिनासी, सन घट बासी, व्यापक परमानन्दा ।
अबिगत गोतीतं, चरित पुनीतं, मायारहित मुकुंदा ॥
जेहि लागि बिरागी, अति अनुरागी, बिगतमोह मुनिवृन्दा ।
निसि बासर ध्यावहिँ, गुन गन गावहिँ, जयति सच्चिदानन्दा ॥

jaya jaya abināsī, sana ghaṭa bāsī, vyāpaka paramānandā |
abigata gotītaṃ, carita punītaṃ, māyārahita mukuṃdā ||
jehi lāgi birāgī, ati anurāgī, bigatamoha munivṛndā |
nisi bāsara dhyāvahim̐, guna gana gāvahim̐, jayati saccidānandā ||

जेहिं सृष्टि उपाई, त्रिबिधि बनाई, सङ्ग सहाय न दूजा ।
सो करउ अघारी, चिन्त हमारी, जानिय भगति न पूजा ॥
जो भव-भय भज्जन, मुनि-मन रञ्जन, गञ्जन बिपति बरूथा ।
मन बच क्रम बानी, छाड़ि सयानी, सरन सकल-सुर-जूथा ॥

jehiṃ sṛṣṭi upāī, tribidhi banāī, saṅga sahāya na dūjā |
so karau aghārī, cinta hamārī, jāniya bhagati na pūjā ||
jo bhava-bhaya bhajjana, muni-mana rañjana, gañjana bipati barūthā |
mana baca krama bānī, chār̤i sayānī, sarana sakala-sura-jūthā ||

सारद स्त्रुति सेषा, रिषय असेषा, जा कहँ कोउ नहिँ जाना ।
जेहि दीन पिआरे, बेद पुकारे, द्रवउ सो श्रीभगवाना ॥
भव-बारिधि-मन्दर, सब निधि सुन्दर, गुनमंदिर सुखपुंजा ।
मुनि सिद्ध सकल सुर, परम भयातुर, नमत नाथ-पद-कञ्जा ॥

sārada struti seṣā, riṣaya aseṣā, jā kaham̐ kou nahim̐ jānā |
jehi dīna piāre, beda pukāre, dravau so śrībhagavānā ||
bhava-bāridhi-mandara, saba nidhi sundara, gunamaṃdira sukhapuṃjā |
muni siddha sakala sura, parama bhayātura, namata nātha-pada-kañjā ||